പാലക്കാട് : നെല്ലിയാമ്പതി ചുരം റോഡിൽ കാട്ടാനക്കൂട്ടം നിലയുറപ്പിച്ചതോടെ ഗതാഗതം തടസ്സപ്പെടുത്തി. സംഭവത്തെത്തുടർന്ന് വാഹനങ്ങള്‍ ഒരുമണിക്കൂറിലധികം സമയം നിര്‍ത്തിയിട്ടു. റോഡരികില്‍ നിലയുറപ്പിച്ചിരുന്ന ആനക്കൂട്ടം പിന്നീട് പതിയെ റോഡ് മുറിച്ച് കടന്ന് വനത്തിനുള്ളിലേക്ക് മറഞ്ഞു.
കുട്ടിയാനകളുൾപ്പെടെ പത്തോളം വരുന്ന ആനകളുടെ കൂട്ടമാണ് ഏറെനേരം റോഡിൽ നിലയുറപ്പിച്ചത്. ചുരത്തോട് ചേർന്ന് അയ്യപ്പൻകൊറ്റ എന്ന സ്ഥലത്താണ് കാട്ടാനക്കൂട്ടം എത്തിയത്. കടുത്ത വേനൽ തുടരുന്ന പശ്ചാത്തലത്തിലാണ് രാത്രിയും പുലർച്ചയും ഇറങ്ങിയിരുന്ന ആനക്കൂട്ടം രാവിലെയും ഇത്തരത്തിൽ ഇറങ്ങുന്നതെന്നു കരുതുന്നു.
