നടിയെ ആക്രമിച്ച കേസില് സംവിധായകൻ വെളിപ്പെടുത്തിയ വിഐപി താനല്ലെന്ന് പ്രവാസി വ്യവസായി മെഹബൂബ് അബ്ദുല്ല പറഞ്ഞു. മൂന്നു വര്ഷം മുന്പ് ഖത്തറില് ‘ദേ പുട്ട്’ തുടങ്ങാനാണ് ദിലീപിനെ ആദ്യമായി നേരിട്ട് കാണുന്നതെന്നും അന്വേഷണവുമായി സഹകരിക്കാന് തയാറാണെന്നും മെഹബൂബ് പറഞ്ഞു. മൂന്ന് വര്ഷം മുന്പ് ദിലീപിനെ വീട്ടില് പോയി കണ്ടിരുന്നു. അവിടെ അദ്ദേഹത്തിന്റെ കുടുംബവും ഉണ്ടായിരുന്നു. ബിസിനസ് കാര്യങ്ങള് സംസാരിക്കുക മാത്രമാണ് ചെയ്തതെന്നും മെഹബൂബ് വെളിപ്പെടുത്തി.
ഖത്തറിലെ ദേപുട്ട് റെസ്റ്റോറന്റിന്റെ നാല് പാര്ട്ണര്മാരില് ഒരാളാണ് ഞാൻ. മറ്റു കാര്യങ്ങളെക്കുറിച്ചൊന്നും അറിയില്ല മെഹബൂബ് വ്യക്തമാക്കി. സംവിധായകന് ബാലചന്ദ്രകുമാറിനെ അറിയില്ല, കണ്ടതായി ഓര്ക്കുന്നുമില്ല മെഹബൂബ് കൂട്ടിച്ചേർത്തു.
ഇതുമായി ബന്ധപ്പെട്ട് അന്വേഷണ ഉദ്യോഗസ്ഥര് ആരും തന്നെ ഇതുവരെ ബന്ധപ്പെട്ടിട്ടില്ല. മന്ത്രിമാർ ആരുമായും തനിക്കു ബന്ധമില്ലെന്നും മെഹബൂബ് പറഞ്ഞു.