പുല്‍വാമ ഭീകരാക്രമണം നടന്ന് ദിവസങ്ങള്‍ക്കുള്ളില്‍ കാശ്മീരിലെ ജെയ്ഷെ മുഹമ്മദ് നേതൃത്വത്തെ ഇല്ലാതാക്കിയെന്ന് സൈന്യം. ഭീകരര്‍ക്ക് കീഴടങ്ങാന്‍ സൈന്യം അന്ത്യശാസനം നല്‍കിയെന്ന് ആര്‍മി ലഫ്. ജനറല്‍ കന്‍വാള്‍ ജീത് സിംഗ് ധില്ലന്‍ പറഞ്ഞു. ശ്രീനഗറില്‍ ജമ്മു കശ്മീര്‍ പൊലീസിന്‍റെയും സിആര്‍പിഎഫിന്‍റെയും സൈന്യത്തിന്‍റെയും മേധാവികള്‍ സംയുക്തമായി നടത്തിയ വാര്‍ത്താ സമ്മേളനത്തിലാണ് അദ്ദേഹത്തിന്‍റെ പ്രതികരണം.
” പുല്‍വാമാ ഭീകരാക്രമണത്തിന് പിന്നില്‍ പാക് സൈന്യമാണ്. ഭീകരര്‍ കീഴടങ്ങുക അല്ലെങ്കില്‍ മരിക്കുക. ഇതാണ് സൈന്യം ഭീകരര്‍ക്ക് നല്‍കിയിരിക്കുന്ന അന്ത്യശാസനം. സൈന്യത്തിന്‍റെ ഭാഗത്തു നിന്ന് ഇനി യാതൊരു ദയയും പ്രതീക്ഷിക്കണ്ട. തോക്ക് താഴെ വച്ചില്ലെങ്കില്‍ അവരെ ഇല്ലാതാക്കിയിരിക്കും. ഇത‌് അവസാന മുന്നറിയിപ്പ‌് ആണ്”- ആര്‍മി ലഫ്. ജനറല്‍ കെ ജി എസ് ധില്ലന്‍ പറഞ്ഞു.
