അതിരാവിലെ എഴുന്നേൽക്കുക എന്നത് പൊതുവെ ആര്‍ക്കും താല്‍പര്യം ഇല്ലാത്ത കാര്യം തന്നെയാണ്.എന്നാൽ ഇങ്ങനെ മൂടിപുതച്ച്‌ കിടന്നാല്‍ ജീവിതത്തില്‍ യാതൊരു നേട്ടവും വന്നു ചേരില്ല . പ്രഭാതത്തിലെ സൂര്യ കിരണങ്ങളോടൊപ്പം എണീക്കുന്നത് നമ്മൾ ശീലമാക്കണം .കാരണം രാവിലെ എഴുനേൽക്കുന്നതിലൂടെ നമ്മളുടെ ശരീരത്തിന് നിരവധി ഗുണങ്ങള്‍ ലഭിക്കുന്നുണ്ട്.അത് എന്തൊക്കെയാണെന്ന് നോക്കാം …
- മാനസികാരോഗ്യം മെച്ചപ്പെടുത്തുന്നു
നല്ലൊരു മാനസികാരോഗ്യം നിലനിര്‍ത്തുവാന്‍ ഏറ്റവുമധികം സഹായിക്കുന്ന ഒന്നാണ് രാവിലെ ഒരു ആറ് മണിക്ക് മുന്‍പ് എഴുന്നേല്‍ക്കുന്നത്. ഇത് നമ്മളുടെ സ്‌ട്രെസ്സ് ലെവല്‍ കുറയ്ക്കുന്നതിനും എല്ലാത്തിലും നല്ലത് മാത്രം കാണുവാന്‍ സഹായിക്കുകയും, കുറച്ചുംകൂടെ വിശാലമനസ്‌കനായി നിലനില്‍ക്കുവാനും ഇത് സഹായിക്കും. എല്ലാത്തിനും സന്തോഷവും മനസ്സിന് സമാധാനവും ഇത് പ്രധാനം ചെയ്യുന്നുണ്ട്.
- എല്ലാത്തിലും വിജയം കൊയ്യുവാന്‍ സാധിക്കുന്നു
രാവിലെ തന്നെ എഴുന്നേല്‍ക്കുന്നവര്‍ക്കും അതുപോലെ, അതിരാവിലെ എഴുന്നേറ്റ് ഇരുന്ന് പഠിക്കുന്നതുമെല്ലാം തന്നെ തലച്ചോറിന്റെ പ്രവര്‍ത്തനത്തെ മെച്ചപ്പെടുത്തുന്ന കാര്യങ്ങളാണ്. ഇത്തരത്തില്‍ പുലര്‍ച്ചെ എഴുന്നേറ്റ് പഠിക്കുന്നവര്‍ക്ക് നല്ല മാര്‍ക്ക് നേടിയെടുക്കുവാന്‍ വളരെയധികം സഹായിക്കുന്ന ഒന്നാണ്. അതുപോലെ ജോലിയില്‍ നല്ല മികച്ച പ്രവര്‍ത്തനം കാഴ്ച്ചവയ്ക്കുന്നതിനും ഇത് സഹായിക്കും.
- കൂടുതല്‍ ക്രിയാത്മകമായി പ്രവര്‍ത്തിക്കുവാന്‍ സാധിക്കുന്നു
രാവിലെതന്നെ എഴുന്നേല്‍ക്കുന്നത് നമ്മളുടെ തലച്ചോറിന്റെ പ്രവര്‍ത്തനത്തെ ഉത്തേജിപ്പിക്കുകയും ഇത് നമ്മളുടെ സര്‍ഗ്ഗാത്മകശേഷി വര്‍ദ്ധിപ്പിക്കുന്നതിനും സഹായിക്കുകയും ചെയ്യുന്നു. അത് പഠനത്തിലായാലും ജോലിക്കാര്യത്തിലായാലും ഇത് ഒരുപോലെ പ്രവര്‍ത്തിക്കുകയും കൂടുതല്‍ മികവ് നിലനിര്‍ത്തുവാന്‍ സാധിക്കുകയും ചെയ്യുന്നുണ്ട്. അതിനാല്‍ തന്നെ രാവിലെ 6 മണിക്ക് മുന്‍പ് എഴുനേല്‍ക്കുന്നത് വളരെ നല്ലകാര്യമാണ്.
- നല്ല ഉറക്കം കിട്ടുവാന്‍ സഹായിക്കുന്നു
രാവിലെ നേര്‍ത്തെ എഴുന്നേറ്റാല്‍ രാത്രിയില്‍ നേരത്തെ തന്നെ കിടന്നുറങ്ങുവാനും നല്ല ഉറക്കം ലഭിക്കുന്നതിനും സഹായിക്കും. ഈ ശീലം സ്ഥിരമാക്കിയാല്‍ നിങ്ങള്‍ക്ക് നല്ല ഉറക്കവും നല്ല ഉന്മേഷവും ഇതിലൂടെ നേടുവാന്‍ സാധിക്കുന്നതാണ്. കുറഞ്ഞത് എട്ട് മണിക്കൂര്‍ ഉറക്കം തീര്‍ച്ചയായും നിങ്ങള്‍ക്ക് ലഭിച്ചിരിക്കും എന്നതില്‍ യാതൊരു സംശയവും ഇല്ല. അതിനാല്‍ തന്നെ രാവിലെ എഴുന്നേറ്റ് ശീലിക്കുന്നത് നല്ലത്.
