ധാക്ക : ബംഗ്ലാദേശ് തലസ്ഥാനമായ ധാക്കയിലെ വാണിജ്യമേഖലയിൽ ഉണ്ടായ ഉഗ്രസ്ഫോടനത്തിൽ 9 പേർ മരിച്ചു. 100 ലധികം പേർക്ക് പരിക്കേറ്റു എന്നാണു ലഭിക്കുന്ന റിപ്പോർട്ടുകൾ. പഴയ ധാക്കയിലെ സിദ്ദിഖ് ബസാറിലെ തിരക്കേറിയ വാണിജ്യ മേഖലയിൽ സ്ഥിതി ചെയ്യുന്ന കെട്ടിടത്തിലാണു ഇന്ന് വൈകുന്നേരം 5 മണിയോടെ സ്ഫോടനമുണ്ടായത്. സ്ഫോടനത്തിൽ കെട്ടിടത്തിന്റെ ചുറ്റുമതിൽ തകർന്നു. ഇതിന്റെ അവശിഷ്ടങ്ങൾക്കിടയിൽ ഇനിയും ആളുകൾ കുടുങ്ങികിടക്കാൻ സാദ്ധ്യതയുള്ളതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്ന് കരുതപ്പെടുന്നു.
പരിക്കേറ്റവരെ സമീപത്തെ ധാക്ക മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഏഴുനില കെട്ടിടത്തിന്റെ താഴത്തെ നിലയിലാണ് സ്ഫോടനമുണ്ടായത്. സമീപത്തെ മറ്റു കെട്ടിടങ്ങൾക്കും സാരമായ കേടുപാടുകൾ സംഭവിച്ചിട്ടുണ്ട് . അതെസമയം സ്ഫോടനത്തിന്റെ കാരണം വ്യക്തമല്ല.