ദില്ലി: പ്രധാനമന്ത്രി നരേന്ദ്ര മോദി നാളെ ജർമ്മനിയിലെത്തും. ജി ഏഴ് ഉച്ചകോടിയിൽ പങ്കെടുക്കാനാണ് പ്രധാനമന്ത്രി നരേന്ദ്ര മോദി നാളെ ജർമ്മനിയിൽ എത്തുക. തിങ്കളാഴ്ച്ച വരെയാണ് ഉച്ചകോടിയുടെ ഭാഗമായി മോദിയുടെ ജർമ്മനി സന്ദർശനം. പരിസ്ഥിതി, ഊർജ്ജം, കാലാവസ്ഥ, ഭക്ഷ്യസുരക്ഷ, ആരോഗ്യം, ലിംഗസമത്വം, ജനാധിപത്യം എന്നിവയാണ് പ്രധാന വിഷയം.
ഉച്ചകോടിയിൽ പങ്കെടുത്ത ശേഷം ചില നേതാക്കളുമായി പ്രത്യേക കൂടിക്കാഴ്ചയും നടത്തും. ജർമ്മനിയിലെ ഷ്ലോസ് എൽമൗയിൽ വച്ചാണ് ഉച്ചകോടി നടക്കുക. ഉച്ചകോടിയിൽ പങ്കെടുത്ത ശേഷം നരേന്ദ്രമോദി ജൂൺ 28 ന് യു.എ.ഇയിലെത്തും.യു.എ.ഇ മുൻ പ്രസിഡന്റും അബുദാബി ഭരണാധികാരിയുമായ ഷെയ്ഖ് ഖലീഫ ബിൻ സായിദ് അൽ നഹ്യാന്റെ വേർപാടിൽ അനുശോചനം രേഖപ്പെടുത്തും കൂടാതെ പുതിയ ഭരണാധികാരി ശൈഖ് മുഹമ്മദ് ബിൻ സായിദ് അൽ നഹ്യാനെ അഭിനന്ദിക്കാനുമാണ് യാത്ര.
നുപുർ ശർമ്മയുടെ പ്രസ്താവനയിൽ നബി നിന്ദയാരോപിച്ച് യുഎഇ ഉൾപ്പെടെ ഗൾഫ് രാജ്യങ്ങൾ വലിയ പ്രതിഷേധം അറിയിച്ചിരുന്നു. ഇതിനു പിന്നാലെയാണ് മോദിയുടെ സന്ദർശനം.