തിരുവനന്തപുരം: ഹിന്ദുവെന്നാൽ ഒരു ഭൂപ്രദേശത്ത് ജനിച്ചവരെ വിശേഷിപ്പിക്കുന്ന പദമാണെന്നും ആ അർത്ഥത്തിൽ തന്നെ ഹിന്ദു എന്ന് വിളിക്കണമെന്നും കേരളാ ഗവർണർ ആരിഫ് മുഹമ്മദ് ഖാൻ. കേരളാ ഹിന്ദൂസ് ഓഫ് നോർത്ത് അമേരിക്ക സംഘടിപ്പിക്കുന്ന ഹിന്ദു കോൺക്ലേവിൽ പങ്കെടുത്ത് സംസാരിക്കുകയായിരുന്നു അദ്ദേഹം. എന്തുകൊണ്ടാണ് തന്നെ അഹിന്ദുവെന്ന് വിളിക്കുന്നത്. ഇന്ത്യയില്‍ ജനിച്ച എല്ലാവരും ഹിന്ദുവാണെന്നും അതൊരു മതത്തിന്റ അടിസ്ഥാനത്തിലല്ല. ഭൂപ്രദേശ അടിസ്ഥാനത്തിലാണ് അങ്ങനെ വിളിക്കുന്നതെന്നും ഗവര്‍ണര്‍ അഭിപ്രായപ്പെട്ടു.
ബിബിസി ഡോക്യുമെന്ററി ഉയർത്തിവിട്ട വിവാദങ്ങളെ കുറിച്ചും അദ്ദേഹം മാദ്ധ്യമ പ്രവർത്തകരോട് സംസാരിച്ചു. രാജ്യത്തിന്റെ വളർച്ചയിൽ പലരും അസൂയാലുക്കളാണെന്നും ഇന്ത്യയിൽ ബ്രിട്ടൻ നടത്തിയ അതിക്രമങ്ങളെ കുറിച്ച് എന്തുകൊണ്ട് ഡോക്യൂമെന്ററികൾ ഉണ്ടാകുന്നില്ലെന്നും അദ്ദേഹം ചോദിച്ചു.
‘ഇന്ത്യ നന്നായി പ്രവര്‍ത്തിക്കുന്നു, അതിനാല്‍ ഈ ആളുകള്‍ നിരാശരാണ്. എന്തുകൊണ്ടാണ് അവര്‍ ബ്രിട്ടീഷ് അതിക്രമങ്ങളെക്കുറിച്ച് ഒരു ഡോക്യുമെന്ററി നിര്‍മ്മിക്കാത്തത്? എന്നാല്‍ നമ്മുടെ സ്വന്തം ആളുകളില്‍ ചിലരോട് എനിക്ക് ഖേദമുണ്ട്, കാരണം അവര്‍ രാജ്യത്തെ ജുഡീഷ്യറിയുടെ വിധിന്യായങ്ങളേക്കാള്‍ ഒരു ഡോക്യുമെന്ററിയെ വിശ്വസിക്കുന്നു’ ഗവര്‍ണര്‍ പറഞ്ഞു.
