പത്തനംതിട്ട: ശബരിമല തീര്ത്ഥാടകര്ക്കുള്ള നിയന്ത്രണങ്ങളില് ഇളവ് വേണമെന്നാവശ്യപ്പെട്ട് മുഖ്യമന്ത്രിക്ക് കത്ത് നല്കി തിരുവിതാംകൂര് ദേവസ്വം ബോര്ഡ്.
വെർച്വൽ ക്യൂ ഒഴിവാക്കണം എന്നും രണ്ട് ഡോസ് വാക്സിനെടുത്തവര്ക്കും ആര്ടിപിസിആര് നെഗറ്റീവ് സര്ട്ടിഫിക്കറ്റുള്ളവര്ക്കും ദര്ശനം അനുവദിക്കണം എന്നും സന്നിധാനത്ത് എത്തുന്നവര്ക്ക് 12 മണിക്കൂര് വരെ കഴിയാന് മുറികള് അനുവദിക്കണമെന്നും ആവശ്യപ്പെട്ടിട്ടുണ്ട്.
നിയന്ത്രണങ്ങളില് ഇളവ് വേണമെന്ന ആവശ്യത്തില് അടുത്ത അവലോകന യോഗത്തില് തീരുമാനമുണ്ടായേക്കും.
അതേസമയം ശബരിമലക്ഷേത്ര തീർത്ഥാടനം പ്രമാണിച്ച് കേരളത്തിൽ നിന്ന് തമിഴ്നാട്ടിലേക്കുള്ള കെഎസ്ആർ ടി സി സർവീസുകൾ നാളെ മുതൽ പുനരാരംഭിക്കും.
സർവീസ് പുനരാരംഭിക്കാൻ തമിഴ്നാട് അനുമതി നൽകിയതിനെത്തുടർന്നാണ് ഈ തീരുമാനം. ശബരിമല തീർത്ഥാടനവുമായി ബന്ധപ്പെട്ട് ബസ് സർവീസ് പുനരാരംഭിക്കണമെന്ന് സർക്കാർ ആവശ്യപ്പെട്ടിരുന്നു.