രാജ്യത്ത് കോവിഡ് ഭീതി ഒഴിയുന്നു. രാജ്യത്ത് ഇന്നലെ 862 പുതിയ കോവിഡ് കേസുകളാണ് രേഖപ്പെടുത്തിയത്. ആറ് മാസത്തിനിടയിലെ ഏറ്റവും കുറവ് കേസുകള്‍ രേഖപ്പെടുത്തിയത് ഇന്നാണ്. കഴിഞ്ഞ 24 മണിക്കൂറിനുള്ളില്‍ 1503 പേര്‍ രോഗമുക്തി നേടി.
ആരോഗ്യ മന്ത്രാലയത്തിന്റെ കണക്കനുസരിച്ച്, തിങ്കളാഴ്ച സജീവ കേസുകളുടെ എണ്ണം 22,549 ആയിരുന്നു. നിലവില്‍, മൊത്തം കേസുകളുടെ 0.05 ശതമാനമാണ് സജീവ കേസുകള്‍. രോഗമുക്തി നിരക്ക് 98.76 ശതമാനമാണ്, മൊത്തം രോഗമുക്തിനിരക്ക് 4.40 കോടി കടന്നു. ആരോഗ്യ മന്ത്രാലയത്തിന്റെ കണക്കനുസരിച്ച് പ്രതിവാര പോസിറ്റിവിറ്റി നിരക്ക് 1.02 ശതമാനമാണ്.
അതേസമയം പ്രതിദിന പോസിറ്റിവിറ്റി നിരക്ക് 1.35 ശതമാനമാണ്. ഇന്ത്യയുടെ മൊത്തം വാക്‌സിനേഷന്‍ കവറേജ് 219.56 കോടി കവിഞ്ഞു. 12-14 വയസ് പ്രായമുള്ളവരില്‍ 4.12 കോടിയിലധികം പേര്‍ക്ക് ആദ്യ ഡോസ് വാക്‌സിനുകള്‍ നല്‍കി.
