തിരുവോണദിവസം ബാറുകള്‍ക്കും അവധി; തീരുമാനം കോവിഡ് പശ്ചാത്തലത്തിൽ

തിരുവനന്തപുരം: ബാറുകളിലൂടെയുളള മദ്യവിൽപ്പന തിരുവോണദിവസം ഉണ്ടാകില്ല. ബെവ്‌കോ, കൺസ്യൂമർഫെഡ് ഷോപ്പുകൾക്ക് നേരത്തേ അവധി പ്രഖ്യാപിച്ചതിനാൽ 31-ന് ബാറുകളിലും മദ്യവിൽപ്പന തടഞ്ഞ് സർക്കാർ ഉത്തരവിറക്കി. കഴിഞ്ഞവർഷം മുതൽ മദ്യവിൽപ്പനകേന്ദ്രങ്ങൾക്ക് തിരുവോണദിവസം സർക്കാർ അവധി നൽകിയിരുന്നു. അതേസമയം ഈ വർഷം അത് ബാറുകൾക്കുകൂടി ബാധകമാക്കുകയാണ്.

കഴിഞ്ഞവർഷം ബാറുകൾ തുറക്കാൻ അനുവദിച്ചത് നിരവധി വിമർശനങ്ങള്‍ക്ക് ഇടയാക്കിയിരുന്നു. ബാറുകൾക്ക് ഓണക്കച്ചവടം നടത്താൻ വേണ്ടിയാണ് ബിവറേജസ് അടച്ചതെന്നായിരുന്നു വിമർശനം.

കോവിഡ് പശ്ചാത്തലത്തിൽ ബാറുകൾ മാത്രം തുറന്നാൽ തിരക്കുണ്ടാകാൻ സാധ്യതയുള്ളതിനാലാണ് മദ്യവിൽപ്പന തിരുവോണദിവസം വേണ്ടെന്ന് സര്‍ക്കാര്‍ ഉത്തരവിറക്കിയത്. ഇന്ന് കഴിഞ്ഞാൽ ഇനി വ്യാഴാഴ്ച ആണ് മദ്യശാലകൾ തുറക്കുക. തിങ്കളാഴ്ച തിരുവോണം അവധിയും സെപ്റ്റംബർ ഒന്നായ ചൊവ്വാഴ്ച ഡ്രൈ ഡേയും, രണ്ടിന് ശ്രീനാരായണഗുരു ജയന്തി പ്രമാണിച്ച് മദ്യവിൽപ്പന നിരോധിച്ചിട്ടുണ്ട്.