നാടിനെ നടുക്കി സാഗറിലെ ദുരന്തം. വ്യാജമദ്യം കവര്‍ന്നത് 12 ജീവനുകള്‍. അന്വേഷണം ശക്തമാക്കി പൊലീസ്

മധ്യപ്രദേശിലെ സാഗര്‍ ജില്ലയിലുണ്ടായ കൂട്ടമരണം വിഷമദ്യ ദുരന്തമാണെന്ന നിഗമനത്തില്‍ അധികൃതര്‍. ശനിയാഴ്ച രാത്രി മദ്യം കഴിച്ചതിനെ തുടര്‍ന്ന് ആരോഗ്യനില വഷളായ 12 പേര്‍ മരണപ്പെടുകയും പത്തോളം പേര്‍ ഗുരുതരാവസ്ഥയില്‍ ആശുപത്രിയില്‍ ചികിത്സയില്‍ തുടരുകയുമാണ്. സാഗറിലെ ഗൂഗര, നൗരാജ്, ബരാജ് എന്നീ ഗ്രാമങ്ങളിലുള്ളവരാണ് ദുരന്തത്തിനിരയായത്.

മദ്യം കഴിച്ച ഉടന്‍ തന്നെ ആളുകള്‍ക്ക് കടുത്ത ഛര്‍ദ്ദി, തലവേദന, പനി തുടങ്ങിയ ലക്ഷണങ്ങള്‍ അനുഭവപ്പെട്ടു. ഇവരെ ഉടന്‍ ആശുപത്രിയില്‍ എത്തിച്ചെങ്കിലും 12 പേരുടെ ജീവന്‍ രക്ഷിക്കാനായില്ല. മരണസംഖ്യ ഇനിയും ഉയരാന്‍ സാധ്യതയുണ്ടെന്ന് ആരോഗ്യവകുപ്പ് അധികൃതര്‍ മുന്നറിയിപ്പ് നല്‍കുന്നു. വിഷമദ്യ ദുരന്തമാണെന്നാണ് പ്രാഥമിക നിഗമനമെങ്കിലും ഔദ്യോഗികമായി സ്ഥിരീകരിച്ചിട്ടില്ല. പോസ്റ്റ്മോര്‍ട്ടം റിപ്പോര്‍ട്ട് വന്നതിന് ശേഷം മാത്രമേ മരണകാരണം വ്യക്തമാകൂയെന്ന് പൊലീസ് അറിയിച്ചു. സംഭവം നടന്ന പ്രദേശങ്ങളില്‍ പൊലീസ് അന്വേഷണം ഊര്‍ജിതമാക്കിയിട്ടുണ്ട്. വ്യാജമദ്യ വിതരണത്തിന് പിന്നില്‍ പ്രവര്‍ത്തിച്ചവരെ കേന്ദ്രീകരിച്ചും അന്വേഷണം നടക്കുകയാണ്.

മരണങ്ങളെക്കുറിച്ച് അന്വേഷിക്കാന്‍ മധ്യപ്രദേശ് മുഖ്യമന്ത്രി മോഹന്‍ യാദവ് ഉത്തരവിട്ടു. ഉത്തരവാദികള്‍ക്കെതിരെ സര്‍ക്കാര്‍ സാധ്യമായ ഏറ്റവും കര്‍ശനമായ നടപടി സ്വീകരിക്കുമെന്ന് അദ്ദേഹം പറഞ്ഞു. മന്ത്രിമാരോടും ഉദ്യോഗസ്ഥരോടും ദുരിതബാധിത പ്രദേശം ഉടന്‍ സന്ദര്‍ശിക്കാന്‍ നിര്‍ദേശിച്ചിട്ടുണ്ടെന്നും ഇത്തരം സംഭവങ്ങള്‍ സര്‍ക്കാര്‍ വച്ചുപൊറുപ്പിക്കില്ലെന്നും അദ്ദേഹം പറഞ്ഞു.

രോഗികളില്‍ കാണപ്പെടുന്ന ലക്ഷണങ്ങള്‍ മീഥൈല്‍ ആല്‍ക്കഹോള്‍ വിഷബാധയുടെ സൂചന ആയിരിക്കാമെന്ന് ചീഫ് മെഡിക്കല്‍ ആന്‍ഡ് ഹെല്‍ത്ത് ഓഫീസര്‍ ദേവേഷ് പട്ടേരിയ പറഞ്ഞു. എന്നിരുന്നാലും വിഷമദ്യ മരണം ഇതുവരെ സ്ഥിരീകരിച്ചിട്ടില്ല. നിരവധി പേര്‍ ചികിത്സയില്‍ തുടരുന്നതിനാല്‍ കൂടുതല്‍ മരണങ്ങള്‍ സംഭവിക്കാനുള്ള സാധ്യത തള്ളിക്കളയാനാവില്ലെന്നും അദ്ദേഹം അഭിപ്രായപ്പെട്ടു.