ഇന്ത്യൻ കൗമാരക്കാരെ ലക്ഷ്യമാക്കി പാകിസ്ഥാന്റെ ലവ് ജിഹാദ് ?ഇൻസ്റ്റാഗ്രാം സുഹൃത്തിനെക്കാണാൻ പാകിസ്ഥാനിലേക്കുള്ള വിമാനടിക്കറ്റ് വാങ്ങാൻ 16-കാരി ജയ്പുര്‍ വിമാനത്താവളത്തിൽ

ജയ്പുര്‍ : രാജസ്ഥാൻകാരിയായ യുവതി വാഗാ അതിർത്തി വഴി പാകിസ്ഥാനിലേക്ക് പോയി ഫേസ്ബുക്ക് സുഹൃത്തിനെ വിവാഹം കഴിച്ചുവെന്ന വാർത്തയുടെ ചൂടാറും മുമ്പ് പാകിസ്ഥാനിലേക്കുള്ള വിമാനടിക്കറ്റ് വാങ്ങാനായി വിമാനത്താവളത്തിലെത്തിയ കൗമാരക്കാരിയായ പെണ്‍കുട്ടിയെ പോലീസും അധികൃതരും തടഞ്ഞുവെന്ന വാർത്ത പുറത്തു വന്നു. ഇക്കഴിഞ്ഞ വെള്ളിയാഴ്ച വൈകുന്നേരമാണ് ജയ്പുര്‍ വിമാനത്താവളത്തിലെത്തിയ 16-കാരിയെയാണ് അധികൃതര്‍ തടഞ്ഞുവെച്ചത്. വീസയോ പാസ്‌പോര്‍ട്ടോ യാത്രാരേഖകളോ ഇല്ലാതെയാണ് പെൺകുട്ടി ടിക്കറ്റ് ആവശ്യപ്പെട്ടെത്തിയത്. ഇന്‍സ്റ്റഗ്രാം സുഹൃത്തിനെ കാണാനായാണ് പാകിസ്ഥാനിലേക്ക് പോകുന്നതെന്നായിരുന്നു പെണ്‍കുട്ടിയുടെ മൊഴി.

സംഭവത്തിലെ ഞെട്ടിക്കുന്ന വസ്തുത എന്തെന്ന് വച്ചാൽ പെണ്‍കുട്ടിക്ക് എങ്ങനെയാണ് പാകിസ്ഥാനിൽ വരേണ്ടത്, യഥാർത്ഥ പേര് ഉപയോഗിക്കരുത്, പാകിസ്ഥാൻ സന്ദര്‍ശിക്കുമ്പോള്‍ ബുര്‍ഖ ധരിക്കണം തുടങ്ങിയ നിര്‍ദേശങ്ങളും ഇന്‍സ്റ്റഗ്രാം സുഹൃത്തായ ആണ്‍കുട്ടി 16-കാരിക്ക് നല്‍കിയിരുന്നു. പരിശോധനയിൽ സംശയകരമായ പല കാര്യങ്ങളും ആണ്‍കുട്ടിയുടെ ഇന്‍സ്റ്റഗ്രാം ഐഡികളിൽ കണ്ടെത്തിയതായി പോലീസ് പറഞ്ഞു. അസ്ലം എന്ന സുഹൃത്തിനെ കാണാനായി പാകിസ്താനിലേക്ക് പോകണമെന്നാണ് പെണ്‍കുട്ടി പോലീസിന് നല്‍കിയ മൊഴി. ഒരുവര്‍ഷം മുന്‍പാണ് ഇന്‍സ്റ്റഗ്രാം വഴി സുഹൃത്തിനെ പരിചയപ്പെട്ടിരുന്നതെന്നും പെണ്‍കുട്ടി പറഞ്ഞിരുന്നു. എന്നാല്‍, ഇതേ ആണ്‍കുട്ടി തന്നെ വ്യത്യസ്ത പേരുകളില്‍ വ്യത്യസ്ത ഇന്‍സ്റ്റഗ്രാം ഐഡികളിലൂടെ പല പെണ്‍കുട്ടികളെയും ബന്ധപ്പെട്ടിരുന്നു എന്നാണ് പോലീസ് കണ്ടെത്തൽ.

ഗസല്‍ മുഹമ്മദ്, അസ്ലം, ചിന്തു, ഫര്‍ഹാന്‍ തുടങ്ങിയ പേരുകളിലാണ് ഇയാള്‍ പെണ്‍കുട്ടികളെ പരിചയപ്പെട്ടിരുന്നത്. ഇക്കൂട്ടത്തില്‍ വിമാനടിക്കറ്റ് വാങ്ങാനെത്തിയ 16-കാരിയുടെ കൂട്ടുകാരികളുണ്ടെന്നും ഇവരുമായും ഇയാള്‍ ചാറ്റ് ചെയ്തിരുന്നതായും പോലീസ് പറഞ്ഞു. അതേസമയം ആണ്‍കുട്ടിയുടെ യഥാര്‍ഥവ്യക്തിത്വത്തെക്കുറിച്ച് ഇതുവരെ വിവരങ്ങളില്ല.