രാജസ്ഥാനില്‍ നീറ്റ് പ്രവേശന പരിശീലന കേന്ദ്രത്തിൽ 2 വിദ്യാർത്ഥികൾ തൂങ്ങിമരിച്ചനിലയിൽ; രണ്ട് മാസത്തിനിടെ ഇത് ഒമ്പതാമത്തെ സംഭവം, അന്വേഷണം ആരംഭിച്ച് പോലീസ്

കോട്ട: രാജസ്ഥാനിലെ കോട്ടയില്‍ എം ബി ബി എസ് പ്രവേശന പരിശീലന കേന്ദ്രത്തിലെ രണ്ട് വിദ്യാര്‍ത്ഥികള്‍ ആത്മഹത്യ ചെയ്തു. ഉഉദയ്പൂര്‍ സ്വദേശിയായ മെഹുല്‍ വൈഷ്ണവ് എന്ന 18 കാരനാണ് ചൊവ്വാഴ്ച രാവിലെ ഹോസ്റ്റല്‍ മുറിയില്‍ തൂങ്ങിമരിച്ചത്. നീറ്റ് പരീക്ഷയ്ക്ക് തയ്യാറെടുക്കുകയായിരുന്നു മെഹുല്‍ വൈഷ്ണവ് എന്ന് പോലീസ് പറഞ്ഞു. സംഭവസ്ഥലത്ത് നിന്ന് ആത്മഹത്യാ കുറിപ്പുകളൊന്നും ലഭിച്ചിട്ടില്ലെന്നും പോലീസ് പറഞ്ഞു. സ്വകാര്യ സ്ഥാപനങ്ങളിൽ പരിശീലനം നടത്തുന്ന വിദ്യാര്‍ത്ഥികളേയാണ് മരിച്ച നിലയില്‍ കണ്ടെത്തിയത്. രണ്ട് മാസത്തിനിടെ രാജസ്ഥാനിലെ കോട്ടയില്‍ പരിശീലനത്തിന് എത്തിയ ഒമ്പത് വിദ്യാർത്ഥികളാണ് ആത്മഹത്യ ചെയ്തത്

സംഭവ സമയത്ത് മെഹുല്‍ തന്റെ ഹോസ്റ്റല്‍ മുറിയില്‍ തനിച്ചായിരുന്നു. ഒപ്പമുണ്ടായിരുന്ന കുട്ടി ആ സമയത്ത് പുറത്തുപോയിരിക്കുകയായിരുന്നു. മണിക്കൂറുകള്‍ കഴിഞ്ഞിട്ടും മെഹുല്‍ മുറിയില്‍ നിന്ന് പുറത്തുവരാത്തതിനെ തുടര്‍ന്ന് വിദ്യാര്‍ത്ഥികള്‍ ഹോസ്റ്റല്‍ വാര്‍ഡനെ വിവരം അറിയിക്കുകയായിരുന്നു. അദ്ദേഹം വാതില്‍ തകര്‍ത്ത് അകത്തു കടന്നപ്പോഴാണ് കുട്ടിയെ മുറിയില്‍ തൂങ്ങിമരിച്ച നിലയില്‍ കണ്ടെത്തിയത്. വിദ്യാര്‍ഥിയുടെ മൃതദേഹം പോസ്റ്റ്മോര്‍ട്ടത്തിന് അയച്ചു.

അതേസമയം , മെഡിക്കല്‍ പ്രവേശന പരീക്ഷയ്ക്ക് തയ്യാറെടുക്കുന്ന മറ്റൊരു വിദ്യാര്‍ത്ഥിയും ആത്മഹത്യ ചെയ്തു. രണ്ട് മാസം മുമ്പ് കോട്ടയിലെത്തിയ ആദിത്യ എന്ന വിദ്യാര്‍ത്ഥിയാണ് മരണപ്പെട്ടത്. കഴിഞ്ഞ രണ്ട് മാസത്തിനിടെ കോട്ടയില്‍ ആകെ ഒമ്പത് വിദ്യാര്‍ത്ഥികള്‍ ആത്മഹത്യ ചെയ്തിരുന്നു. മെയ് മാസത്തില്‍ ഇത്തരത്തിലുള്ള അഞ്ച് കേസുകള്‍ റിപ്പോര്‍ട്ട് ചെയ്യപ്പെട്ടിരുന്നു. അതേസമയം മരണപ്പെട്ട വിദ്യാര്‍ത്ഥികളുടെ രക്ഷിതാക്കള്‍ തങ്ങളുടെ കുട്ടികളുടെ മരണത്തില്‍ ആശങ്ക ഉന്നയിച്ചു. എന്നാല്‍ വിദ്യാര്‍ത്ഥികള്‍ പഠനത്തില്‍ സമ്മര്‍ദ്ദം നേരിട്ടിട്ടുണ്ടോ എന്നതിനെക്കുറിച്ച് ഇന്‍സ്റ്റിറ്റ്യൂട്ട് അധികാരികളില്‍ നിന്ന് ഇതുവരെ പ്രതികരണം ലഭിച്ചിട്ടില്ലെന്നാണ് റിപ്പോര്‍ട്ട്.