7 മാസം പ്രായമുള്ള കുഞ്ഞിനെ ബലാത്സംഗത്തിനിരയാക്കിയ കേസ് ! പ്രതിക്ക് വധശിക്ഷയിൽ കുറഞ്ഞതൊന്നും ചിന്തിക്കാൻ പോലും കഴിയില്ലെന്ന് കോടതി

7 മാസം പ്രായമുള്ള കുഞ്ഞിനെ തട്ടിക്കൊണ്ടുപോയി ബലാത്സംഗം ചെയ്ത് ഉപേക്ഷിച്ച 34കാരന് വധശിക്ഷ വിധിച്ച് കോടതി. സംഭവത്തെ അപൂർവങ്ങളിൽ അപൂർവമായി പരിഗണിച്ചാണ് കൊൽക്കത്തയിലെ പ്രത്യേക പോക്സോ കോടതി പ്രതിക്ക് വധശിക്ഷ വിധിച്ചത്. 34 കാരനായ രാജീബ് ഘോഷാണ് കേസിലെ പ്രതി. 2024 നവംബർ 30ന് അമ്മയോടൊപ്പം വഴിയരികിൽ കിടന്നുറങ്ങുകയായിരുന്ന കുഞ്ഞിനെയാണ് ഇയാൾ തട്ടിക്കൊണ്ടുപോയി പീഡിപ്പിച്ചത്. കുഞ്ഞിന് 10 ലക്ഷം നഷ്ടപരിഹാരം നൽകാനും കോടതി ഉത്തരവിട്ടു. ‘ഇതിൽ കുറഞ്ഞൊരു ശിക്ഷ കോടതിക്ക് ചിന്തിക്കാൻ കഴിയില്ലെന്ന്’ വിധി പുറപ്പെടുവിച്ചുകൊണ്ട് ജഡ്ജി ഇന്ദ്രില്ല മുഖർജി മിത്ര പറഞ്ഞു. വിധിയെ ‘ചരിത്രപരമെന്നാണ്’ സ്പെഷ്യൽ പബ്ലിക് പ്രോസിക്യൂട്ടർ ബിവാസ് ചാറ്റർജി വിശേഷിപ്പിച്ചത്.

കുട്ടിയെ ബലാത്സംഗം ചെയ്തതിന് ശേഷം വഴിയിൽ ഉപേക്ഷിച്ച് ഇയാൾ കടന്നുകളയുകയായിരുന്നു. പിന്നാലെ കരച്ചിൽ കേട്ട പ്രദേശവാസികൾ പോലീസിൽ വിവരം അറിയിക്കുകയായിരുന്നു. ഈസമയം കുഞ്ഞിനെ അന്വേഷിച്ച് നടക്കുകയായിരുന്നു മാതാപിതാക്കൾ. ആശുപത്രിയിലെത്തിച്ച് നടത്തിയ പ്രാഥമിക പരിശോധനയിലാണ് കുട്ടി ലൈംഗികമായി പീഡിപ്പിക്കപ്പെട്ടെന്ന് മനസിലായത്. കുട്ടിയുടെ ദേഹത്ത്, സ്വകാര്യ ഭാഗങ്ങളിലുൾപ്പെടെ മുറിവുകളും ഉണ്ടായിരുന്നു. സിസിടിവി ദൃശ്യങ്ങളുടെ സഹായത്തോടെയാണ് പോലീസ് പ്രതിയെ തിരിച്ചറിഞ്ഞത്. സംഭവം നടന്ന് അഞ്ചാം നാൾ പ്രതി പിടിയിലായി കുഞ്ഞിന്റെ ശരീരത്തിൽ ആജീവനാന്തം പരിക്കുകൾ നിലനിൽക്കുമെന്നാണ് ഡോക്ടർമാർ വ്യക്തമാക്കിയിരിക്കുന്നത്.

കുറ്റകൃത്യം നടന്ന് മൂന്ന് മാസത്തിനുള്ളിൽ വിചാരണ പൂർത്തിയാക്കി വിധി പുറപ്പെടുവിച്ചു. ഏകദേശം 80 ദിവസം കൊണ്ടാണ് പ്രതിയെ അറസ്റ്റ് ചെയ്ത് വിചാരണ പൂർത്തിയായി വിധി പുറപ്പെടുവിച്ചത്