ദമ്പതികളുടെ കൈവശം പുതിയ ഫോൺ, സംസ്ഥാനത്തുടനീളം ഉല്ലാസയാത്ര; സംശയം തോന്നിയ നാട്ടുകാരുടെ ഇടപെടലിൽ തെളിഞ്ഞത് വൻ ക്രൂരത, മൊബൈല്‍ ഫോണ്‍ വാങ്ങാന്‍ എട്ട് മാസം പ്രായമായ കുഞ്ഞിനെ വിറ്റ ഭാര്യയുംഭർത്താവും അറസ്റ്റില്‍

മൊബൈല്‍ ഫോണ്‍ വാങ്ങാനും ഉല്ലാസ യാത്ര നടത്താനും എട്ട് മാസം പ്രായമുള്ള കുഞ്ഞിനെ വിറ്റ ദമ്പതികൾ പോലീസിന്റെ പിടിയിൽ. ദമ്പതികളായ ജയദേവ് ഘോഷ്, സതി എന്നിവരെയാണ് പോലീസ് കസ്റ്റഡിയിലെടുത്തത്. പശ്ചിമ ബംഗാളിലെ നോര്‍ത്ത് 24 പര്‍ഗാനാസ് ജില്ലയിലാണ്ഞെട്ടിപ്പിക്കുന്ന സംഭവം അരങ്ങേറിയത്. ദമ്പതികളുടെ കൈവശം പുതിയ ഫോണ്‍ കാണുകയും അതേസമയം സംസ്ഥാനത്ത് ഉടനീളം ഉല്ലാസ യാത്ര നടത്തുകയും ചെയ്തതിൽ നാട്ടുകാർക്ക് തോന്നിയ സംശയമാണ് സ്വന്തംകുഞ്ഞിനെ വിറ്റതായി പുറം ലോകം അറിയുന്നത്. ഇവർക്ക് ഒരു മകൾകൂടി ഉണ്ട്. ഒന്നരമാസം മുമ്പ് കുഞ്ഞിനെ വിറ്റതായാണ് വിവരം. ഇവരുടെ കുഞ്ഞിനെയും കണ്ടെത്തിയിട്ടുണ്ട്.

ദമ്പതികള്‍ കുഞ്ഞിനെ വിറ്റ പ്രിയങ്ക ഘോഷ് എന്ന സ്ത്രീയെയും പോലീസ് അറസ്റ്റ് ചെയ്തിട്ടുണ്ട്. പ്രിയങ്കയെ ഖര്‍ദ പോലീസ് സ്റ്റേഷനിലേക്ക് കൊണ്ടുപോയെങ്കിലും അവര്‍ മറ്റ് വിശദാംശങ്ങളൊന്നും വെളിപ്പെടുത്തിയിട്ടില്ല. കുഞ്ഞിനെ അമ്മാവന്റെ വീട്ടിലാക്കിയിരിക്കുകയാണെന്നാണ് ദമ്പതികൾ പറഞ്ഞിരുന്നത്. എന്നാല്‍ പിന്നീട്, കുഞ്ഞിനെ വിറ്റതായി പോലീസിന്റെ ചോദ്യം ചെയ്യലിൽ ഇവർ സമ്മതിക്കുകയായിരുന്നു.