തലസ്ഥാനത്ത് പട്ടാപ്പകൽ തോക്കുചൂണ്ടി കവർച്ചാ ശ്രമം, സംഘമെത്തിയത് ആളില്ലാത്ത വീട്ടിൽ, ചോദ്യം ചെയ്ത പോലീസുകാരനെയും ഭീഷണിപ്പെടുത്തി, അന്വേഷണം ആരംഭിച്ച് പോലീസ്

തിരുവന്തപുരം: തലസ്ഥാനത്ത് പട്ടാപകൽ തോക്കുചൂണ്ടി മോഷണത്തിന് ശ്രമം. ഇടപ്പഴഞ്ഞിയിലാണ് സംഭവം. മോഷണത്തിന് ശേഷം നാട്ടുകാരെ കണ്ട കള്ളന്മാർ രക്ഷപ്പെടാൻ ശ്രമിക്കുന്നതിനിടെ തടയാൻ ശ്രമിച്ച പോലീസുകാരനെ അക്രമികൾ തോക്കുചൂണ്ടി ഭീഷണിപ്പെടുത്തുകയായിരുന്നു. യെല്ലോ കളറിലുള്ള ആക്ടീവയിലാണ് രണ്ടംഗ സംഘമെത്തിയത്. ആളില്ലാത്ത വീട്ടിൽ നിന്നും രണ്ട് പേർ ഇറങ്ങിവരുന്നത് അയൽവാസിയുടെ ശ്രദ്ധയിൽപ്പെട്ടതോടെയാണ് സംഭവം പുറത്തറിഞ്ഞത്.

അയൽവാസിയായ ലാൽ, ഇവരോട് കാര്യം തിരക്കി. ഇതോടെ സംഘം സ്കൂട്ടറിൽ രക്ഷപ്പെടാൻ ശ്രമിച്ചു. അസ്വാഭാവികത തോന്നിയ ലാൽ ഉടൻ തന്നെ സംഘത്തിന്റെ വാഹനത്തിന്റെ താക്കോൽ ഊരിയെടുത്തു. പെട്ടന്ന് സ്കൂട്ടറിന് പിറകിലിരിക്കുകയായിരുന്നയാൾ ബാഗിൽ നിന്നും തോക്ക് പുറത്തെടുക്കുകയായിരുന്നുവെന്നാണ് ലാൽ പറയുന്നത്. ഹിന്ദി ഭാഷയാണ് ഇരുവരും സംസാരിക്കുന്നത്.

അതേസമയം ഇവരുടെ സിസിടിവിയിൽ ദൃശ്യങ്ങൾ ലഭിച്ചിട്ടുണ്ട്. പോലീസ് സംഘത്തിന് വേണ്ടി നഗരത്തിൽ അലർട്ട് നിർദ്ദേശം നൽകിയിട്ടുണ്ട്. കുളത്തൂർ സ്വദേശിയുടേതാണ് സ്കൂട്ടറെന്ന് കണ്ടെത്തിയിട്ടുണ്ട്. ഈ ആക്ടീവ ശ്രീകണഠേശ്വരത്ത് വെച്ച് ഒരു പോലീസുകാരൻ തടഞ്ഞിരുന്നു. എന്നാൽ ഇദ്ദേഹത്തെയും തോക്ക് ചൂണ്ടി ഭീഷണിപ്പെടുത്തി പ്രതികൾ രക്ഷപ്പെടുകയായിരുന്നു.