ലഹരിക്കടത്ത് കേസിലെ പ്രതി ആലപ്പുഴ നഗരസഭാ കൗൺസിൽ യോഗത്തിൽ; ശക്തമായ പ്രതിഷേധവുമായി പ്രതിപക്ഷം; ഷാനവാസ് സഭയിൽ തുടരുന്നത് പോലീസിന്റെ ഒത്തുകളിയെത്തുടർന്ന് ?

ആലപ്പുഴ: നിരോധിത പുകയില ലഹരിവസ്തുക്കൾ കടത്തിയ കേസിലെ ലോറിയുടെ ഉടമയും സിപിഎം നേതാവും കൗൺസിലറുമായ എ ഷാനവാസ് കൗൺസിൽ യോഗത്തിൽ പങ്കെടുക്കുന്നതിനെതിരെ പ്രതിപക്ഷ പ്രതിഷേധം. സഭയുടെ നടുത്തളത്തിലിറങ്ങി പ്രതിഷേധിക്കുകയാണ് പ്രതിപക്ഷ കൗൺസിലർമാർ. ലഹരിക്കടത്ത് കേസിൽ പ്രതിയായ ഷാനവാസിനെ മേയർ സംരക്ഷിക്കുകയാണെന്ന് പ്രതിപക്ഷം ആരോപിക്കുന്നു. നഗരസഭയുടെ ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ കൂടിയാണ് ഷാനവാസ്. ആ സ്ഥാനം രാജിവച്ച് അന്വേഷണം നേരിടണമെന്നാണ് പ്രതിപക്ഷ ആവശ്യം.

അതേസമയം പാർട്ടിയിൽ നിന്ന് സസ്‌പെൻഡ് ചെയ്‌തെങ്കിലും സ്റ്റാൻഡിങ് കമ്മിറ്റി ചെയർമാൻ സ്ഥാനത്ത് തുടരുന്നത് പോലീസിന്റെ സഹായത്തോടെയാണെന്ന് ആരോപണം. നിയമവിരുദ്ധമായി പോലീസ് ഷാനവാസിനെ സഹായിക്കുകയാണ്. ലഹരിവസ്തുക്കൾ കടത്തിയ ലോറിയുടെ ഉടമയായിട്ടും പോലീസ് ഷാനവാസിനെ പ്രതി ചേർക്കാനോ എഫ് ഐ ആർ രജിസ്റ്റർ ചെയ്യാനോ തയ്യാറായിട്ടില്ല. ഇത് മുതലെടുത്താണ് സ്ഥാനങ്ങൾ രാജിവയ്ക്കില്ലെന്ന് ഷാനവാസ് നിലപാടെടുത്തിരിക്കുന്നത്. ലഹരിക്കടത്ത് കേസിലെ പ്രതികൾ ഷാനവാസിനൊപ്പം ആഘോഷ പരിപാടികളിൽ പങ്കെടുക്കുന്നതിന്റെ തെളിവുകൾ പുറത്തുവന്നിട്ടും പാർട്ടി സംസ്ഥാന നേതൃത്വം ഷാനവാസിനെ സംരക്ഷിക്കുന്നതായി സിപിഎമ്മിന് ഉള്ളിൽപ്പോലും അഭിപ്രായങ്ങൾ ഉയർന്നിരുന്നു.