തലസ്ഥാന നിവാസികളുടെ നിരന്തര അഭ്യർത്ഥന; തത്വമയി ഒരുക്കുന്ന ‘ദി കേരളാ സ്റ്റോറി’ പ്രത്യേക സൗജന്യ പ്രദർശനം അല്പസമയത്തിനകം തിരുവനന്തപുരം ഏരീസ് പ്ലക്‌സ്‌ തീയറ്ററിൽ

തിരുവനന്തപുരം : മത മൗലികവാദ സംഘടനകൾ പ്രദർശന വിലക്ക് പ്രഖ്യാപിച്ച ദി കേരളാ സ്റ്റോറിക്ക് പിന്തുണ പ്രഖ്യാപിച്ച് ക്ഷണിക്കപ്പെട്ട സദസ്സിനും പൊതുജനങ്ങൾക്കുമായി തത്വമയി കേരളത്തിലുടനീളം സംഘടിപ്പിക്കുന്ന സൗജന്യ പ്രദർശന പരമ്പര, പത്തനംതിട്ട ജില്ലയിലെ വൻ വിജയമായ 2 പ്രദർശനങ്ങൾക്ക് ശേഷം തലസ്ഥാന നിവാസികളുടെ പ്രത്യേക അഭ്യർത്ഥന പ്രകാരം തിരുവനന്തപുരം ജില്ലയിൽ വീണ്ടും സംഘടിപ്പിക്കപ്പെടുന്നു. ഇന്ന് രാവിലെ 8 മണിക്ക് തിരുവനന്തപുരം ഏരീസ് പ്ലക്‌സ്‌ തിയേറ്ററിലാണ് പ്രത്യേക സൗജന്യ പ്രദർശനം ഒരുക്കിയിരിക്കുന്നത്. പ്രദർശന പരമ്പരയിലെ അഞ്ചാമത് പ്രദർശനമാണിത്. നേരത്തെ പന്തളം ത്രിലോക് സിനിമാസിൽ രണ്ടു തവണയും തിരുവനന്തപുരം ഏരീസ് പ്ലക്‌സ്‌ തിയേറ്ററിൽ രണ്ടു തവണയും നിറഞ്ഞ സദസിൽ ചിത്രത്തിൻറെ പ്രദർശനം നടന്നിരുന്നു.

കേരളത്തിൽ നിന്നും ലവ് ജിഹാദിന്റെ കെണിയിൽപ്പെട്ട് ഐ എസ്സിലേക്ക് റിക്രൂട്ട് ചെയ്യപ്പെട്ട പെൺകുട്ടികളുടെ കഥ പറയുന്ന ചിത്രമാണ് കേരളാ സ്റ്റോറി. ചിത്രത്തിനെതിരെ ഇസ്ലാമിക സംഘടനകളും ഇടത് സംഘനടകളും രംഗത്ത് വന്നിരുന്നു. ചിത്രത്തിന്റെ പ്രദർശനം തടയണമെന്ന ആവശ്യം ഹൈക്കോടതിയും സുപ്രീംകോടതിയും തള്ളിയിരുന്നു. എങ്കിലും തീയറ്റർ ഉടമകളെ ഭീഷണിപ്പെടുത്തി പ്രദർശനം തടയാൻ തീവ്രവാദ സംഘടനകൾ ശ്രമിച്ചിരുന്നു. ഈ സാഹചര്യത്തിലാണ് മാദ്ധ്യമ ധർമ്മം രാഷ്ട്ര വൈഭവത്തിന് എന്ന മുദ്രാവാക്യം ഉയർത്തിപ്പിടിച്ച് തത്വമയി ചിത്രത്തിന്റെ പ്രത്യേക പ്രദർശന പരമ്പര ഒരുക്കുന്നത്.

നേരത്തെ രാമസിംഹൻ സംവിധാനം ചെയ്ത മലബാർ ഹിന്ദു വംശഹത്യയുടെ കഥപറയുന്ന പുഴ മുതൽ പുഴവരെ, കശ്മീരി പണ്ഡിറ്റുകളുടെ സഹനത്തിന്റെ ചരിത്രം പുറത്തു കൊണ്ടുവന്ന വിവേക് അഗ്നിഹോത്രി ചിത്രമായ കശ്മീർ ഫയൽസിന്റെയും പ്രത്യേക പ്രദർശനം സമാനമായ രീതിയിൽ തത്വമയി ഒരുക്കിയിരുന്നു. സംവിധായകൻ വിവേക് അഗ്നിഹോത്രി നേരിട്ട് തത്വമയിയുടെ ഈ ഉദ്യമത്തെ പ്രത്യേകം പ്രശംസിച്ചിരുന്നു.