ആളൊരുക്കം ബ്രിക്സ് ഫിലിം ഫെസ്റ്റിവല്ലിൽ

ദില്ലി: പ്രവാസി വ്യവസായി ജോളി ലോനപ്പൻ നിർമ്മിച്ച് വിസിഅഭിലാഷ് രചനയും സംവിധാനവും നിർവഹിച്ച മലയാള ചലച്ചിത്രം ആളൊരുക്കം ബ്രസീലിലെ റിയോ ഡി ജനീറോയിൽ നടക്കുന്ന നാലാമത് ബ്രിക്സ് ഫിലിം ഫെസ്റ്റിവല്ലിന്റെ സമകാലീന മത്സര വിഭാഗത്തിലേക്ക് ഇന്ത്യയുടെ ഔദ്യോഗിക എൻട്രിയായി തിരഞ്ഞെടുക്കപ്പെട്ടു.

ഈ വർഷത്തെ ബ്രിക്സ് ഉച്ചകോടിയോടനുബന്ധിച്ച് സെപ്റ്റംപർ 23 മുതൽ ഒക്ടോബർ 9 വരെയാണ് ഫെസ്റ്റിവൽ നടക്കുന്നത്. രാജ്യത്തെ നാല് സംവിധായകരുടെ രണ്ട് വീതം വർക്കുകളാണ് വാർത്താവിതരണ മന്ത്രാലയത്തിന്റെ കീഴിലുള്ള ഡയറക്ടറേറ്റ് ഓഫ് ഫിലിം ഫെസ്റ്റിവൽസ് ഒദ്യോഗികമായി ബ്രിക്സ് ഫെസ്റ്റിവല്ലിലേക്ക് നോമിനേറ്റ് ചെയ്തിരുന്നത്. ഇതിൽ നിന്നാണ് ആളൊരുക്കം ഇന്ത്യയുടെ ഔദ്യോഗിക എൻട്രിയായി ഫെസ്റ്റിവൽ ടീം തിരഞ്ഞെടുത്തിരിക്കുന്നത്.

ആളൊരുക്കത്തെ കൂടാതെ വി.സി.അഭിലാഷ് സംവിധാനം ചെയ്ത ഡോക്യുമെന്ററി ‘ഒരു സുപ്രധാന കാര്യവും’ ഇന്ത്യയുടെ നോമിനേഷൻ ലിസ്റ്റിൽ ഉൾപ്പെട്ടിരുന്നു.ഇന്ത്യയിൽ നിന്ന് ഒരു ചലചിത്രത്തിന് കൂടി ഫെസ്റ്റിവൽ എൻട്രി ലഭിക്കും.മാധ്യമ പ്രവർത്തകനായ വി സി അഭിലാഷ് സംവിധാനം ചെയ്ത ആദ്യ ചിത്രമാണ് ആളൊരുക്കം.ഇന്ദ്രൻസിന് മികച്ച നടനുള്ള സംസ്ഥാന അവാർഡും സാമൂഹിക പ്രസക്തിയേറിയ ചിത്രത്തിനുള്ള നാഷണൽ അവാർഡുമടക്കം ഒട്ടേറെ ദേശീയ അന്തർദേശീയ പുരസ്കാരങ്ങൾ ആളൊരുക്കം സ്വന്തമാക്കിയിരുന്നു.

സംവിധായകൻ വി.സി.അഭിലാഷ്, നിർമ്മാതാവ് ജോളി ലോനപ്പൻ എന്നിവർ ഫെസ്റ്റിവലിൽ പങ്കെടുക്കും.