ഒറ്റ ദിവസം കൊണ്ട് കണ്ടെത്തിയത് പതിനഞ്ചോളം മൃത​​​ദേ​ഹങ്ങൾ !രക്ഷാപ്രവർത്തനത്തിൽ സജീവമായി പോലീസ് നായകൾ

വയനാട് ചൂരൽമലയെയും മുണ്ടക്കൈയെയും തകർത്തെറിഞ്ഞ ഉരുൾപ്പൊട്ടലിൽ മരണസംഖ്യ 319 ൽ എത്തി നിൽക്കുകയാണ്. രക്ഷാപ്രവർത്തനം നാലാം ദിനത്തിൽ എത്തി നിൽക്കുന്ന പശ്ചാത്തലത്തിൽ ദുരന്തഭൂമിയിൽ രക്ഷാപ്രവർത്തനത്തിൽ പ്രധാന പങ്ക് വഹിക്കുന്ന ഒരു വിഭാഗത്തെ അധികമാരും പ്രശംസിച്ചു കണ്ടില്ല. എന്നാൽ ചെളിയും കെട്ടിടാവശിഷ്ടങ്ങളും മൂടിക്കിടക്കുന്ന ദുരന്തഭൂമിയിൽ രക്ഷാപ്രവർത്തകരെ കൃത്യമായി മൃതദേഹങ്ങൾക്കടുത്ത് എത്തിക്കുന്നതിൽ ഇവർ വഹിക്കുന്ന പങ്ക് വളരെ വലുതാണ് താനും.

ദുരന്തമുഖത്ത് പ്രവർത്തിക്കുന്ന പോലീസ് നായകളാണ് ഇന്ന് ദുരന്തമുഖത്ത് നിർണ്ണായക സാന്നിധ്യമായത്‌.
മായ, മർഫി, മാ​ഗി എന്നീ പോലീസ് നായകൾ. കൊച്ചി സിറ്റിയുടെ രണ്ട് കഡാവർ നായകളും വയനാട് ജില്ലയുടെ റെസ്ക്യു നായയും ചേർന്ന് ഇന്നലെ മാത്രം കണ്ടെത്തിയത് പതിനഞ്ചോളം മൃത​​​ദേ​ഹങ്ങളാണ്. മർഫി മാത്രം ഇന്ന് കണ്ടെത്തിയത് അഞ്ച് മൃതദേഹങ്ങളും. വെള്ളമുള്ള പ്രദേശങ്ങളിൽ രക്ഷാപ്രവർത്തനം ദുഷ്കരമാണെങ്കിലും മൃതദേ​ഹം ഉണ്ടാവാൻ സാധ്യതയുള്ള ഏകദേശ സ്ഥലങ്ങൾ രക്ഷാപ്രവർത്തകർക്ക് പറഞ്ഞുകൊടുക്കാൻ ഇവർക്ക് കഴിയും.