പിടികിട്ടാപുള്ളി ക്രൈംബ്രാഞ്ച് കസ്റ്റഡിയിൽ !19 വർഷത്തിനുശേഷംപിടിയിലായത് മാദ്ധ്യമപ്രവർത്തകനെ വധിക്കാൻ ശ്രമിച്ച കേസിലെ പ്രതി

കോഴിക്കോട്: പിടികിട്ടാപുള്ളി ഉസ്മാൻ ഖാമിസ് ഒതുമൻ അൽ ഹമാദിയെയാണ് കോഴിക്കോട് ക്രൈം ബ്രാഞ്ച് ഡൽഹിയിൽ അറസ്റ്റ് ചെയ്തത്‌.19 വർഷം മുൻപ്‌ മാദ്ധ്യമപ്രവർത്തകനെ വെട്ടികൊലപ്പെടുത്താൻ ശ്രമിച്ച കേസിലെ പ്രതിയാണ് ഉസ്മാൻ.കോഴിക്കോട് സ്വദേശിയായ പ്രതി 16 വർഷമായി വിദേശത്ത് ഒളിവിൽ കഴിയുകയായിരുന്നു.

ദി ക്രിമിനൽ’ എന്ന പത്രത്തിന്റെ ഉടമ വെള്ളയിൽ സ്വദേശി ഷംസുദ്ദീനെ സംഘം ചേർന്ന് വെട്ടിക്കൊലപ്പെടുത്താൻ ശ്രമിച്ച കേസിലെ ഒന്നാം പ്രതിയാണ് ഉസ്മാൻ.നടക്കാവ് പോലീസ് അന്വേഷണം നടത്തിയ കേസ് പിന്നീട് ക്രൈംബ്രാഞ്ച് ഏറ്റെടുക്കുകയും മുഴുവൻ പ്രതികളെയും അറസ്റ്റ് ചെയ്യുകയും ചെയ്തിരുന്നു.എന്നാൽ പിന്നീട് ജാമ്യത്തിൽ ഇറങ്ങിയ പ്രതി വിദേശത്തേക്ക് കടക്കുകയായിരുന്നു എന്നാണ് വിവരം.യു.എ.ഇ.യിൽ ഉസ്മാൻ ഖാമിസ് ഒതുമൻ അൽ ഹമാദി എന്ന പേര് മാറ്റി പാസ്പോർട്ട് ഉണ്ടാക്കിയാണ് ഒളിവിൽ കഴിഞ്ഞിരുന്നതെന്നാണ് അന്വേഷണ ഉദ്യോഗസ്ഥർ പറഞ്ഞത്. എന്നാൽ ക്രൈംബ്രാഞ്ച് പുതിയ പാസ്‌പോർട്ട് വിവരങ്ങൾ കണ്ടെത്തുകയും ഇൻറർപോളുമായി ബന്ധപ്പെട്ട് പ്രതിയുടെ പേരിൽ റെഡ് നോട്ടീസ് പുറപ്പെടുവിച്ചു. പ്രതി വിദേശത്ത് നിന്ന് ഡൽഹി ഇന്ദിരഗാന്ധി ഇൻ്റർനാഷണൽ എയർപോർട്ടിൽ വന്നിറങ്ങിയ സമയം എമിഗ്രേഷൻ അധികൃതർ തടഞ്ഞു.തുടർന്ന് കോഴിക്കോട് ബ്രാഞ്ച് ഡിറ്റക്റ്റീവ് ഇൻസ്പെക്ടർ പി.വി. വിനേഷ് കുമാർ, എസ്.ഐ. എം.കെ.സുകു എന്നിവർ ദില്ലിയിലെത്തി പ്രതിയെ അറസ്റ്റു ചെയ്യുകയായിരുന്നു.