അമൃത്സർ, അമേരിക്കയില്‍ നിന്ന് വരുന്ന വിമാനങ്ങള്‍ക്ക് ഏറ്റവും അടുത്തുള്ള അന്താരാഷ്ട്ര വിമാനത്താവളം ! ഭഗവന്ത് മന്നിന്റെ ആരോപണങ്ങൾക്ക് തക്കമറുപടിയുമായി ബിജെപി

ദില്ലി : അനധികൃത കുടിയേറ്റക്കാരെന്ന് കണ്ടെത്തി തിരിച്ചയക്കുന്ന ഇന്ത്യക്കാരെയും വഹിച്ചുകൊണ്ടുള്ള വിമാനം അമൃത്സറില്‍ ഇറക്കുന്നതിനെ വിമർശിച്ച പഞ്ചാബ് മുഖ്യമന്ത്രി ഭഗവന്ത് മന്നിന് തക്കമറുപടിയുമായി ബിജെപി. അമേരിക്കയില്‍ നിന്ന് ഇന്ത്യയിലേക്ക് വരുന്ന വിമാനങ്ങള്‍ക്ക്, ഏറ്റവും അടുത്തുള്ള അന്താരാഷ്ട്ര വിമാനത്താവളമാണ് അമൃത്സറെന്നും അതിനാലാണ് നാടുകടത്തിയവരുമായി വന്ന വിമാനം അവിടെ ഇറക്കിയതെന്നും പറഞ്ഞ ബിജെപി ദേശീയ വക്താവ് ആര്‍ പി സിങ്. മന്‍, വിഷയത്തെ രാഷ്ട്രീയവത്കരിക്കുന്നത് നിര്‍ത്തണമെന്നും അറിവില്ലായ്മ കാരണം ഗൂഢാലോചനാസിദ്ധാന്തങ്ങളെ പ്രോത്സാഹിപ്പിക്കുന്നത് അവസാനിപ്പിക്കണമെന്നും തുറന്നടിച്ചു.

നാടുകടത്തപ്പെട്ടവരുമായി തിരിച്ചെത്തുന്ന വിമാനങ്ങള്‍ അമൃത്സറില്‍ ഇറക്കുന്നത് പഞ്ചാബിനെ അപമാനിക്കാനാണ് കേന്ദ്രസര്‍ക്കാര്‍ ശ്രമമെന്നും വിശുദ്ധനഗരമായ അമൃത്സറിനെ ഡിപോര്‍ട്ടേഷന്‍ സെന്ററാക്കി കേന്ദ്രം മാറ്റിയെന്നുമായിരുന്നു ഭഗവന്ത് മന്നിന്റെ ആരോപണം .

ഇത്തരം വിഷയങ്ങള്‍ രാഷ്ട്രീയവത്കരിക്കുന്നതില്‍നിന്ന് പഞ്ചാബ് മുഖ്യമന്ത്രി ഭഗവന്ത് മന്‍ വിട്ടുനില്‍ക്കണമെന്ന് ബിജെപി എം.പി. പ്രവീണ്‍ ഖണ്ഡേല്‍വാല്‍ പറഞ്ഞു. രാജ്യത്തിന്റെ സുരക്ഷയേക്കുറിച്ച് ചിന്തിക്കുന്നവരല്ല എഎപി നേതാക്കളെന്നും അവര്‍ രാഷ്ട്രീയമേ കളിക്കൂവെന്നും ഖണ്ഡേല്‍വാല്‍ വിമര്‍ശിച്ചു.