മദ്ധ്യപ്രദേശിൽ കുഴൽ കിണറ്റിൽ വീണ എട്ട് വയസ്സുകാരൻ മരിച്ചു;നാല് ലക്ഷം രൂപ സഹായധനം പ്രഖ്യാപിച്ച് സർക്കാർ

ഭോപ്പാൽ:മദ്ധ്യപ്രദേശിൽ കുഴൽ കിണറ്റിൽ വീണ എട്ടുവയസ്സുകാരൻ മരിച്ചു.കുട്ടിയെ പുറത്തെടുത്തെങ്കിലും ജീവൻ രക്ഷിക്കാനായില്ല.കുടുംബത്തിന് മദ്ധ്യപ്രദേശ് സർക്കാർ നാല് ലക്ഷം രൂപ സഹായധനം പ്രഖ്യാപിച്ചു.മദ്ധ്യപ്രദേശിലെ വിദിഷയിൽ കഴിഞ്ഞ ദിവസം രാവിലെ പതിനൊന്നോടെ എട്ടു വയസ്സുകാരൻ കുഴൽ കിണറ്റിൽ വീണത്.അറുപതടി താഴ്ച്ചയുള്ള കുഴൽക്കിണറിൽ 20 മണിക്കൂറിലധികമായി കുട്ടി കുടുങ്ങിക്കിടക്കുകയായിരുന്നു.

കുട്ടിക്ക് രക്ഷാപ്രവർത്തകർ ഓക്സിജൻ നൽകുന്നുണ്ടായിരുന്നു.എന്നാൽ കുഴൽ കിണറിനുള്ളിൽ നിന്നും ശബ്ദം കേൾക്കുന്നുണ്ടായിരുന്നു എന്നല്ലാതെ കുട്ടിയുമായി സംസാരിക്കാനോ ഭക്ഷണം എത്തിച്ചു കൊടുക്കാനോ രക്ഷാപ്രവർത്തകർക്ക് സാധിച്ചിരുന്നില്ല. സംസ്ഥാന ദുരന്ത നിവാരണ സേനയും ദേശീയ ദുരന്ത നിവാരണ സേനയുമാണ് രക്ഷാദൗത്യത്തിലുണ്ടായിരുന്നത്. കുട്ടി കുഴൽകിണറിനുള്ളിൽ വീണ ഉടൻ തന്നെ പോലീസ് സ്ഥലത്തെത്തിയിരുന്നു.