പ്രാർത്ഥനകൾ വിഫലം!ചെങ്ങന്നൂരിൽ കിണറിൽ നിന്ന് പുറത്തെടുത്ത വയോധികൻ മരിച്ചു

ആലപ്പുഴ: ചെങ്ങന്നൂരിന് സമീപം കിണർ വ്യത്തിയാക്കുന്നതിനിടെ കിണറിന്റെ കോൺക്രീറ്റ് ഉറ (റിംഗുകൾ) ഇടിഞ്ഞ് കിണറ്റിൽ അകപ്പെട്ട വയോധികൻ മരിച്ചു. കോടുകുളഞ്ഞി പെരുംകുഴി കൊച്ചു വീട്ടിൽ യോഹന്നാൻ (72) ആണ് മരിച്ചത്. നാട്ടുകാരും അഗ്നിശമന സേനയും പൊലീസും ചേർന്ന് നടത്തിയ മണിക്കൂറുകൾക്ക് നീണ്ട പരിശ്രമത്തിന് ശേഷം യോഹന്നാനെ കിണറിൽ നിന്ന് പുറത്തെടുത്തിരുന്നു. 11മണിക്കൂറിനൊടുവിൽ കിണറ്റിൽ നിന്ന് പുറത്തെടുത്തപ്പോൾ ഇയാൾ അബോധാവസ്ഥയിലായിരുന്നു. പിന്നാലെ മരിച്ചതായി സ്ഥിരീകരിച്ചു.

മഴക്കാല മുന്നൊരുക്കത്തിന്റെ ഭാഗമായി കോടുകുളഞ്ഞി ജംഗ്ഷനു സമീപമുള്ള സ്വകാര്യ വ്യക്തിയുടെ വീട്ടിലെ കിണര്‍ വൃത്തിയാക്കാൻ ഇറങ്ങിയതായിരുന്നു യോഹന്നാൻ . കിണറിനുള്ളിൽ വളർന്നു നിന്ന ചെടികൾ പറിച്ച് വൃത്തിയാക്കുന്നതിനിടെ കിണറിന്‍റെ സിമിന്‍റ് ഉറകൾ താഴേക്ക് ഇടിഞ്ഞു വീഴുകയായിരുന്നു. ശബ്ദം കേട്ട് വശങ്ങളിലേക്ക് ഒഴിഞ്ഞുമാറാൻ ശ്രമിച്ചെങ്കിലും അപ്പോഴേക്കും താഴേക്കു വീണ റിംഗുകൾക്കടിയിൽ യോഹന്നാന്‍റെ കാലുകൾ കുടുങ്ങുകയായിരുന്നു.