മഹാകാളികാ യാഗത്തിന് വിളംബരം!! പൗർണമിക്കാവിൽ നാളെ നട തുറക്കും; യാഗത്തിന്റെ ബ്രോഷർ പ്രകാശനം തിരുവനന്തപുരം മേയർ വി.വി. രാജേഷ് നിർവ്വഹിക്കും ; ക്ഷേത്രനടയിൽ 25-ഓളം വ്യത്യസ്ത കോലങ്ങൾ അണിനിരക്കുന്ന പടയണിയും

തിരുവനന്തപുരം: വെങ്ങാനൂർ പൗർണ്ണമിക്കാവ് ശ്രീ ബാല ത്രിപുര സുന്ദരി ദേവീ ക്ഷേത്രത്തിൽ ധനു മാസത്തിലെ പൗർണ്ണമി ദിനമായ നാളെ നട തുറക്കും. 2026 ഡിസംബറിൽ നടക്കാനിരിക്കുന്ന മഹാകാളികാ യാഗത്തിന്റെ ഭാഗമായുള്ള പ്രാരംഭ പൂജകൾക്കും അനുബന്ധ കലാപരിപാടികൾക്കും നാളെ തുടക്കമാകും. രാവിലെ പഞ്ചമുഖ ഗണപതിയുടെ സന്നിധിയിൽ ശൃംഗേരി ശങ്കരാചാര്യ മഠത്തിലെ മുഖ്യ പുരോഹിതൻ ഫണി കുമാർ ശർമ്മയുടെ കാർമ്മികത്വത്തിൽ നടന്ന പ്രത്യേക ഗണപതി ഹോമത്തോടെയാണ് ചടങ്ങുകൾ ആരംഭിക്കുന്നത്.

വൈകുന്നേരം 4 മണിക്ക് മഹാകാളികാ യാഗത്തിന്റെ ബ്രോഷർ പ്രകാശനം തിരുവനന്തപുരം കോർപ്പറേഷൻ മേയർ വി.വി. രാജേഷ് നിർവ്വഹിക്കും. ചടങ്ങിൽ കോവളം എം.എൽ.എ എം. വിൻസെന്റ്, വെങ്ങാനൂർ പഞ്ചായത്ത് പ്രസിഡന്റ് ശാലിനി, ബിജെപി സംസ്ഥാന അദ്ധ്യക്ഷൻ രാജീവ് ചന്ദ്രശേഖർ, അനൂപ് ആന്റണി, ചെങ്കൽ എസ്. രാജശേഖരൻ തുടങ്ങിയ പ്രമുഖ വ്യക്തികൾ പങ്കെടുക്കും. യാഗത്തിന്റെ വിളംബരമറിയിച്ച് വൈകുന്നേരം 4.30 മുതൽ മധ്യതിരുവിതാംകൂറിലെ പുരാതന കലാരൂപമായ പടയണി അരങ്ങേറും. പടയണി ഗ്രാമങ്ങൾക്ക് പുറത്ത് ദക്ഷിണ കേരളത്തിലെ ഒരു ക്ഷേത്രത്തിൽ ഇത്ര വിപുലമായി ഈ കലാരൂപം അവതരിപ്പിക്കപ്പെടുന്നത് ഇതാദ്യമായാണ്.

നാളെ പൗർണ്ണമിക്കാവിൽ നടക്കുന്ന പടയണിയിൽ ശിവക്കോലം, ഗണപതിക്കോലം, മറുതക്കോലം, പക്ഷിക്കോലം, സുന്ദരയക്ഷിക്കോലം, ഭൈരവിക്കോലം തുടങ്ങി 25-ഓളം വ്യത്യസ്ത കോലങ്ങൾ അണിനിരക്കും. ഏകദേശം നാലര മണിക്കൂർ നീണ്ടുനിൽക്കുന്ന ഈ അപൂർവ്വ ദൃശ്യവിരുന്ന് കാണാൻ നിരവധി ഭക്തർ എത്തുമെന്നാണ് പ്രതീക്ഷിക്കുന്നത്.

പൗർണ്ണമി ദിനമായ ഇന്ന് പുലർച്ചെ 4 മണി മുതൽ രാത്രി 10 മണി വരെ ഭക്തർക്കായി ക്ഷേത്രനട തുറന്നിരിക്കുമെന്ന് ഭാരവാഹികൾ അറിയിച്ചു. കൂടാതെ ക്ഷേത്ര നടയിൽ രാവിലെ മുതൽ വിവിധ കലാപരിപാടികളും നടക്കുന്നുണ്ട്.