സംശയ രോഗം മൂലം അരുംകൊല; വർക്കലയിൽ നവവധുവിനെ തലയ്ക്കടിച്ച് കൊന്ന് ഭർത്താവ്, പ്രതി കസ്റ്റഡിയിൽ

തിരുവനന്തപുരം: വർക്കലയിൽ അരുംകൊല. നവവധുവിനെ ഭർത്താവ് തലയ്ക്കടിച്ചു കൊന്നു. 26 കാരി നിഖിതയാണ് മരിച്ചത്. ഭർത്താവ് അനീഷിനെ (35) വർക്കല പോലീസ് കസ്റ്റഡിയിലെടുത്തു. പുലർച്ചെ രണ്ടു മണിയോടെയായിരുന്നു സംഭവം.

ഭർത്തൃഗൃഹത്തിൽ ആണ് നിഖിത കൊല്ലപ്പെട്ടത്. നിലവിളക്ക് ഉപയോഗിച്ച് ഭർത്താവ് തലയ്ക്ക് അടിച്ചു കൊലപ്പെടുത്തി എന്നാണ് പ്രാഥമിക വിവരം. ഭാര്യയോടുള്ള അനീഷിന്റെ സംശയമാണ് കൊലപാതകത്തിന് കാരണമെന്ന് പോലീസ് പറഞ്ഞു.

സംഭവം നടക്കുന്ന സമയത്ത് അനീഷിന്റെ മാതാപിതാക്കളും വീട്ടിൽ ഉണ്ടായിരുന്നു. സയന്റിഫിക് വിഭാഗം എത്തിയതിനുശേഷം മാത്രമേ കൂടുതൽ വിവരങ്ങൾ പറയാൻ കഴിയൂ എന്ന് പോലീസ് അറിയിച്ചു. ഇരുവരുടെയും വിവാഹം രണ്ടുമാസം മുമ്പായിരുന്നു.