ദൈവത്തെ ക്രിമിനൽ പ്രവർത്തനവുമായി താരതമ്യപ്പെടുത്തുന്നത് അനുവദിക്കില്ല! മഹാഭാരതത്തിലും ലവ് ജിഹാദ് നടന്നെന്ന ഭൂപെൻ ബോറയുടെ പരാമർശത്തിനെതിരെ രൂക്ഷമായി പ്രതികരിച്ച് അസം മുഖ്യമന്ത്രി ഹിമന്ത ബിശ്വ ശർമ്മ

മഹാഭാരതത്തിലും ലവ് ജിഹാദ് നടന്നെന്ന ഭൂപെൻ ബോറയുടെ പരാമർശത്തിനെതിരെ രൂക്ഷമായി പ്രതികരിച്ച് അസം മുഖ്യമന്ത്രി ഹിമന്ത ബിശ്വ ശർമ്മ. കൃഷ്ണൻ രുക്മിണിയെ വിവാഹം കഴിക്കാൻ ആഗ്രഹിച്ചപ്പോൾ അർജ്ജുനൻ സ്ത്രീ വേഷത്തിലാണ് വന്നതെന്നും മഹാഭാരതത്തിലും ലൗ ജിഹാദ് നടന്നെന്നുമായിരുന്നു ബോറയുടെ പരാമർശം. ഇതിനെതിരെയാണ് ഹിമന്ത ബിശ്വ ശർമ്മ രൂക്ഷമായി പ്രതികരിച്ചത്. ബോറയുടെ പരാമർശം സനാതനത്തിനും ഹിന്ദു ധർമ്മത്തിനും എതിരാണെന്നും ശ്രീകൃഷ്ണനെ വിവാദങ്ങളിലേക്ക് വലിച്ചിഴയ്ക്കുന്നത് ഒഴിവാക്കണമെന്നും ദൈവത്തെ ക്രിമിനൽ പ്രവർത്തനവുമായി താരതമ്യപ്പെടുത്തുന്നത് അനുവദിക്കില്ലെന്നും ബിശ്വ ശർമ്മ ആഞ്ഞടിച്ചു.

“ഭഗവാൻ കൃഷ്ണൻ ഒരിക്കലും രുക്മിണിയെ അവളുടെ മതം മാറ്റാൻ നിർബന്ധിച്ചിട്ടില്ലെന്നും തെറ്റായ ഐഡന്റിറ്റിയുടെ മറവിൽ ഒരു പെൺകുട്ടിയെ വിവാഹം കഴിക്കുകയും പിന്നീട് മതം മാറാൻ നിർബന്ധിതയാകുകയും ചെയ്യുന്നതാണ് ലൗ ജിഹാദ്”എന്നും ഹിമന്തകൂട്ടിച്ചേർത്തു. മിശ്രവിവാഹം നടന്നാലും മതം മാറാൻ നിർബന്ധിക്കരുതെന്നും, അത്തരം വിവാഹം സ്‌പെഷ്യൽ മാരേജ് ആക്‌ട് പ്രകാരമായിരിക്കണമെന്നും ഹിമന്ത പറഞ്ഞു.