അന്വേഷണത്തിൽ വൻ വീഴ്ച്ച; പ്രോസിക്യൂഷന് കനത്ത തിരിച്ചടി; അശ്വിനി കുമാർ വധക്കേസിൽ 13 പ്രതികളെ കോടതി വെറുതെവിട്ടു! പോപ്പുലർ ഫ്രണ്ടിന്റെ ആദ്യരൂപമായ എൻ ഡി എഫ് ഭീകരരെ രക്ഷിച്ചത് സർക്കാരും പോലീസും ?

കണ്ണൂർ: രാഷ്ട്രീയ സ്വയം സേവക സംഘം കണ്ണൂർ ജില്ലാ ബൗദ്ധിക് പ്രമുഖും, ഹിന്ദു ഐക്യവേദി കണ്ണൂർ ജില്ലാ കൺവീനറും പ്രഗതി കോളേജ് അദ്ധ്യാപകനുമായിരുന്ന അശ്വിനികുമാർ വധക്കേസിൽ 13 പ്രതികളെ കോടതി വെറുതെവിട്ടു. ആകെ 14 പ്രതികളാണ് കേസിലുള്ളത്. മൂന്നാം പ്രതിയെ മാത്രമാണ് കുറ്റക്കാരാനെന്ന് കണ്ടെത്തിയത്. പ്രതികളെല്ലാം പോപ്പുലർ ഫ്രണ്ടിന്റെ ആദ്യ രൂപമായ എൻ ഡി എഫ് പ്രവർത്തകരാണ്. പുന്നാട് നിന്നും ഇരുട്ടിയിലേക്ക് ബസ്സിൽ യാത്ര ചെയ്യുകയായിരുന്ന അശ്വിനി കുമാറിനെ ബസ് തടഞ്ഞു നിർത്തി ബോംബെറിഞ്ഞ് ഭീകരാന്തരീക്ഷം സൃഷ്‌ടിച്ച ശേഷം വെട്ടിയും കുത്തിയും കൊല്ലുകയായിരുന്നു. 2005 മാർച്ച് പത്തിനായിരുന്നു കേരളത്തെ നടുക്കിയ കൊലപാതകം നടന്നത്.

പട്ടാപ്പകൽ നടന്ന കൊലപാതകത്തിൽ പ്രതികളെ നിയമത്തിന് മുന്നിൽ കൊണ്ടുവരാനും മാതൃകാപരമായി ശിക്ഷിക്കാനും കഴിയാത്തത് രാഷ്ട്രീയ ഇടപെടലുകളാണെന്ന ആരോപണം ഉയരുകയാണ്. അന്വേഷണത്തിലെ പാളിച്ചകളാണ് തിരിച്ചടിയായതെന്ന് സ്പെഷ്യൽ പ്രോസിക്യൂട്ടർ ജോസെഫ് തോമസ് പ്രതികരിച്ചു. പി കെ മധുസൂദനന്റെ നേതൃത്വത്തിൽ ക്രൈം ബ്രാഞ്ച് ആണ് കേസന്വേഷിച്ചത്. പോലീസും സർക്കാരും ചേർന്നാണ് പ്രതികളെ രക്ഷിച്ചതെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ ആരോപിച്ചു. നീതിക്കായി ഏതറ്റംവരേയും പോകുമെന്നും മേൽക്കോടതികളെ സമീപിക്കുമെന്നും അശ്വിനി കുമാറിന്റെ മാതാവ് അറിയിച്ചു.

നിരോധിത ഭീകര സംഘടനയായ പോപ്പുലർ ഫ്രണ്ടിന്റെ ആദ്യരൂപമായ എൻ ഡി എഫിന്റെ പ്രവർത്തകരാണ് പ്രതികളെല്ലാം. ഒന്നാം പ്രതി അബ്ദുൾ അസീസ് അടക്കമുള്ള പ്രതികൾ ഭീകരവാദ ക്കേസുകളിൽ ശിക്ഷിക്കപ്പെട്ടിട്ടുള്ളവരാണ്. നാല് വർഷം നീണ്ട അന്വേഷണത്തിനൊടുവിൽ 2009 ലാണ് കേസിൽ കുറ്റപത്രം നൽകിയത്. കണ്ണൂർ ജില്ലയിലെ സംഘപ്രസ്ഥാനങ്ങൾക്ക് കരുത്തുപകരുന്ന പ്രവർത്തനം നടത്തിയിരുന്ന സ്വയംസേവകനായിരുന്നു അശ്വിനി കുമാർ. കേരളത്തിൽ വേരുറപ്പിക്കാൻ തുടങ്ങിയിരുന്ന ഇസ്ലാമിക തീവ്രവാദത്തിന്റെ ആദ്യകാല ഇരകളിൽ ഒരാളായി മാറുകയായിരുന്നു ദേശീയ സംഘടനകളുടെ ആശയപ്രചാരകനായി സമൂഹത്തിന്റെ അംഗീകാരം നേടിയ അശ്വിനി കുമാർ.