സിസ്റ്റം ഓവർലോഡ് ചെയ്യാൻ ശ്രമം? നടന്നത് മാൽവെയർ ആക്രമണം? ദില്ലി വിമാനത്താവളത്തിൽ സംഭവിച്ചത് ഇതാണ്

ഇന്ത്യയിലെ ഏറ്റവും തിരക്കേറിയ വിമാനത്താവളമായ ദില്ലി ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ എയർ ട്രാഫിക് കൺട്രോൾ അഥവാ ATC സംവിധാനത്തിലുണ്ടായ ഗുരുതരമായ സാങ്കേതിക തകരാർ കാരണം വിമാന സർവീസുകൾ പൂർണ്ണമായും താളം തെറ്റിയിരുന്നു. ഇന്നലെ പുലർച്ചെ തുടങ്ങിയ ഈ പ്രശ്നം രാവിലെ തിരക്കേറിയ സമയങ്ങളിൽ രൂക്ഷമായി, 100-ലധികം വിമാനങ്ങൾ വൈകുകയും ആയിരക്കണക്കിന് യാത്രക്കാർ വിമാനത്താവളത്തിൽ കുടുങ്ങിക്കിടക്കുകയും ചെയ്തു. വിമാനത്താവളത്തിൽ പരിഭ്രാന്തിയും ആശയക്കുഴപ്പവും പടർന്നു.

വിമാന ഗതാഗതം നിയന്ത്രിക്കാൻ ഉപയോഗിക്കുന്ന ഓട്ടോമേഷൻ സോഫ്റ്റ്‌വെയറിലെ തകരാറാണ് പ്രശ്‌നങ്ങൾക്ക് വഴിവെച്ചതെന്നാണ് അധികൃതരുടെ പ്രാഥമിക നിഗമനം. സിസ്റ്റം ഓവർലോഡ് ചെയ്യാൻ ശ്രമിക്കുന്ന ഒരു മാൽവെയർ ആക്രമണം വഴിയാകാം സോഫ്റ്റ്‌വെയർ തകരാറിലായതെന്നാണ് റിപ്പോർട്ടുകൾ സൂചിപ്പിക്കുന്നത്. സിസ്റ്റം ഇൻ്റർഫേസുകളെയോ എടിസിയിലെ റഡാർ സമന്വയ ഭാഗങ്ങളെയോ പ്രത്യേകമായി ലക്ഷ്യമിട്ടാണ് ആക്രമണം നടന്നതെന്ന കാര്യവും അന്വേഷണ ഉദ്യോഗസ്ഥർ പരിശോധിക്കുന്നുണ്ട്.

ഈ സംഭവത്തിലെ പ്രധാന ആശങ്കകളിൽ ഒന്ന്, വിമാനത്താവളത്തിലെ ഈ നിർണ്ണായക സംവിധാനത്തിന് ആവശ്യമായ അപ്‌ഡേറ്റുകൾ നഷ്‌ടപ്പെട്ടിരുന്നുവെന്നും, തത്സമയ ബാക്കപ്പ് സംവിധാനം ഇല്ലായിരുന്നുവെന്നതുമാണ്. ആധുനിക വ്യോമയാനം വിവര സാങ്കേതികവിദ്യാ സംവിധാനങ്ങളെ അമിതമായി ആശ്രയിക്കുന്നു എന്നതിലേക്കാണ് ഈ സംഭവം വിരൽചൂണ്ടുന്നത്.

വിമാനത്താവളത്തിൻ്റെ നിയന്ത്രിത വ്യോമമേഖലയിലും ഗ്രൗണ്ടിലും വിമാനങ്ങളുടെ സഞ്ചാരം നിയന്ത്രിക്കുകയും മാർഗ്ഗനിർദ്ദേശം നൽകുകയും ചെയ്യുന്ന ഭൗമ അധിഷ്ഠിത സേവനമാണ് എയർ ട്രാഫിക് കൺട്രോൾ (ATC). വിമാനങ്ങളുടെ കൂട്ടിയിടികൾ തടയുക, ഫ്ലൈറ്റ് പാതകൾ നിയന്ത്രിക്കുക, വിമാനം ടേക്ക് ഓഫ് ചെയ്യുന്നതും ലാൻഡ് ചെയ്യുന്നതും കൈകാര്യം ചെയ്യുക എന്നിവയെല്ലാം എടിസിയുടെ സുപ്രധാന ചുമതലകളാണ്.

പ്രശ്നത്തിൻ്റെ കാതൽ ഓട്ടോമാറ്റിക് മെസേജ് സ്വിച്ചിംഗ് സിസ്റ്റത്തിൻ്റെ അധവാ AMSS പ്രവർത്തനരഹിതമാകലാണ്. എയർ ട്രാഫിക് കൺട്രോളർമാർ വിമാന ഗതാഗതം നിയന്ത്രിക്കാൻ ഉപയോഗിക്കുന്ന ഓട്ടോ ട്രാക്ക് സിസ്റ്റത്തിലേക്ക് ആവശ്യമായ ഫ്ലൈറ്റ് പ്ലാനും റൂട്ടിംഗ് ഡാറ്റയും യാന്ത്രികമായി എത്തിക്കുന്ന ഒരു സുപ്രധാന ആശയവിനിമയ ശൃംഖലയാണ് AMSS. ഈ AMSS തകരാറിലായപ്പോൾ, എയർ ട്രാഫിക് കൺട്രോളർമാർക്ക് അവരുടെ സ്ക്രീനുകളിൽ ഫ്ലൈറ്റ് പ്ലാനുകൾ സ്വയമേവ സൃഷ്ടിക്കാനും സ്വീകരിക്കാനുമുള്ള കഴിവ് നഷ്ടപ്പെട്ടു.

സാങ്കേതിക പ്രശ്നം എയർപോർട്ട് അതോറിറ്റി ഓഫ് ഇന്ത്യ (AAI) സ്ഥിരീകരിക്കുകയും AMSS സംവിധാനം എത്രയും വേഗം പുനഃസ്ഥാപിക്കാൻ സാങ്കേതിക വിദഗ്ദ്ധർ പ്രവർത്തിക്കുന്നുണ്ടെന്നും അറിയിക്കുകയും ചെയ്തു. എന്നാൽ, പ്രവർത്തനങ്ങൾ പൂർണ്ണമായും സാധാരണ നിലയിലാകാൻ ഏറെ സമയമെടുക്കുമെന്ന് അധികൃതർ മുന്നറിയിപ്പ് നൽകി.

ഹൈടെക് ഓട്ടോമേറ്റഡ് സംവിധാനം നിലച്ചതോടെ, എയർ ട്രാഫിക് കൺട്രോളർമാർക്ക് ഫ്ലൈറ്റ് പ്ലാനുകൾ മാനുവലായി പ്രോസസ്സ് ചെയ്യാൻ നിർബന്ധിതരായി. ദിവസേന 1,500-ൽ അധികം വിമാന സർവീസുകൾ കൈകാര്യം ചെയ്യുന്ന ഒരു വിമാനത്താവളത്തിൽ, ഈ രീതി വളരെ മന്ദഗതിയിലുള്ളതും അനിയന്ത്രിതവുമാണ്.

മിഡ്-മോണിംഗ് ആയപ്പോഴേക്കും വിമാനങ്ങൾ പുറപ്പെടുന്നതിൽ ശരാശരി 50 മിനിറ്റ് മുതൽ ഒരു മണിക്കൂർ വരെ കാലതാമസം നേരിടുന്നതായി ഫ്ലൈറ്റ് ട്രാക്കിംഗ് ഡാറ്റ കാണിച്ചു. ഡസൻ കണക്കിന് വിമാനങ്ങൾ ഗേറ്റുകളിൽ കുടുങ്ങിക്കിടന്നു. ദില്ലി മാത്രം ഒതുങ്ങാതെ, ജയ്പൂർ, ലഖ്‌നൗ ഉൾപ്പെടെയുള്ള വടക്കൻ പ്രാദേശിക വിമാനത്താവളങ്ങളിലും ഈ തകരാർ കാരണം കാലതാമസത്തിന് ഇടയാക്കി.

ഇൻഡിഗോ, എയർ ഇന്ത്യ, സ്പൈസ് ജെറ്റ് തുടങ്ങിയ എയർലൈനുകൾ യാത്രക്കാർക്ക് മുന്നറിയിപ്പ് നൽകി. എടിസി സംവിധാനത്തിലെ പ്രശ്നം എല്ലാ വിമാനക്കമ്പനികളുടെയും പ്രവർത്തനങ്ങളെ ബാധിക്കുന്നതായി അവർ സ്ഥിരീകരിച്ചു. വിമാനത്താവളത്തിലേക്ക് പുറപ്പെടുന്നതിന് മുമ്പ് യാത്രക്കാർ വിമാനത്തിന്റെ നില പരിശോധിക്കാനും ജീവനക്കാർ യാത്രക്കാർക്ക് ബുദ്ധിമുട്ട് കുറയ്ക്കുന്നതിനായി സഹായം നൽകുന്നുണ്ടെന്നും എയർലൈനുകൾ അറിയിച്ചു.

ഇന്ത്യയിൽ ATC നിയന്ത്രിക്കുന്നത് എയർപോർട്ട്സ് അതോറിറ്റി ഓഫ് ഇന്ത്യയിലെ (AAI) ഉദ്യോഗസ്ഥരാണ്. ശാരീരികവും മാനസികവുമായി ഏറെ ക്ഷമത വേണ്ട ഈ ജോലിയിലേക്ക് ഒരു പൊതുപ്രവേശന പരീക്ഷയ്ക്കും മെഡിക്കൽ പരിശോധനയ്ക്കും ശേഷമാണ് തിരഞ്ഞെടുപ്പ്. വിജയിക്കുന്നവർക്ക് ദില്ലിയിലെ എയർ ട്രാഫിക് ഇൻസ്റ്റിറ്റ്യൂട്ടിൽ മൂന്നു മാസം കഠിന പരിശീലനം. അതിൽ വിജയിക്കുന്നവർക്കേ എയർ ട്രാഫിക് ലൈസൻസ് പരീക്ഷ എഴുതാനാകൂ. ഒരിക്കൽ ലൈസൻസ് നേടിയവർ മൂന്നുവർഷം കൂടുമ്പോൾ വീണ്ടും പരീക്ഷയെഴുതി വിജയിച്ച് ലൈസൻസ് പുതുക്കിയാൽ മാത്രമേ ജോലിയിൽ തുടരാനാകൂ.