റിലീസിന് മുന്നേ കോടികൾ വാരി മമ്മൂട്ടി ചിത്രം “യാത്ര”

ആന്ധ്രപ്രദേശ് മുൻമുഖ്യമന്ത്രി വൈ.എസ്. രാജശേഖര റെഡ്ഡിയുടെ ജീവിതം പ്രമേയമാക്കിയ “യാത്ര” എന്ന ചിത്രത്തിനായുള്ള കാത്തിരിപ്പിലാണ് ആരാധകർ. മമ്മൂട്ടി മുഖ്യവേഷത്തിൽ എത്തുന്ന സിനിമ റിലീസാകുന്നതിനു മുൻപേ റെക്കോർഡുകളിൽ ഇടംപിടിച്ചുക്കഴിഞ്ഞു. വമ്പൻ തുകയ്ക്കാണ് ചിത്രത്തിന്‍റെ ആദ്യ ടിക്കറ്റ് വിറ്റുപോയത്.

സിനിമയുടെ പ്രചാരണ പരിപാടിയുടെ ഭാഗമായി അമേരിക്കയിലെ സിയാറ്റിലിൽ നടന്ന കന്നി പ്രദർശനത്തിൽ ലേലത്തിലൂടെ 4.37 ലക്ഷം രൂപയ്ക്കാണ് ആദ്യ ടിക്കറ്റ് വിറ്റുപോയത്‌. ഈ പണം വൈ.എസ് രാജശേഖര റെഡ്ഡി ഫൗണ്ടേഷനിലേക്ക് സംഭാവന ചെയ്യുമെന്ന് സംഘാടകർ പറഞ്ഞു. മുനീശ്വർ റെഡ്ഡിയെന്നയാളാണ് യാത്രയുടെ ആദ്യ ടിക്കറ്റ് സ്വന്തമാക്കിയതെന്നാണ് റിപ്പോർട്ട്.

2004 ൽ പ്രതിപക്ഷ നേതാവായിരുന്ന വൈ.എസ്.ആർ സംസ്ഥാന വ്യാപകമായി നടത്തിയ കാൽനടയാത്രയാണ് സിനിമയുടെ പ്രമേയം.1992നു ശേഷം മമ്മൂട്ടി അഭിനയിക്കുന്ന തെലുങ്കു ചിത്രം കൂടിയാണ് “യാത്ര”. മാഹി വി രാഘവാണ് ചിത്രത്തിന്‍റെ സംവിധായകൻ. ഫെബ്രുവരി എട്ടിനാണ് സിനിമയുടെ റിലീസ്.