ഭാരതാംബ രാജ്യത്തിന്റെ അടയാളം ! ഭാരതാംബയുടെ ചിത്രം ഇനി രാജ്ഭവനിൽ നിന്ന് മാറ്റില്ല ! ഉറച്ച നിലപാടുമായി ഗവർണർ രാജേന്ദ്ര ആർലേക്കർ

തിരുവനന്തപുരം: ഭാരതാംബ രാജ്യത്തിന്റെ അടയാളമാണെന്നും ഭാരതാംബയുടെ ചിത്രം രാജ്ഭവനിൽ നിന്ന് മാറ്റില്ലെന്നുമുള്ള ഉറച്ച നിലപാടുമായി ഗവർണർ രാജേന്ദ്ര ആർലേക്കർ. ഭാരതാംബയുടെ ചിത്രത്തിന് മുന്നിൽ തന്നെയാണ് രാജ്ഭവനിൽ പരിസ്ഥിതി ദിനാഘോഷം നടത്തിയത്. ചിത്രത്തിന് മുന്നിൽ പൂക്കൾ അർപ്പിച്ചാണ് ​ഗവർണർ രാജേന്ദ്ര ആര്‍ലേര്‍ പരിപാടി ആരംഭിച്ചത്. മന്ത്രിമാര്‍ പരിപാടിയിൽ പങ്കെടുക്കാത്തതിലും ഗവര്‍ണര്‍ രൂക്ഷ വിമർശനമാണ് നടത്തിയത്. മന്ത്രിമാര്‍ക്ക് വരാന്‍ കഴിയാത്ത എന്താണുളളതെന്നായിരുന്നു ഗവര്‍ണറുടെ ചോദ്യം.

ലോകപരിസ്ഥിതി ദിനാഘോഷത്തിൻറെ സംസ്ഥാന തല ഉദ്ഘാടനമായിരുന്നുഇന്ന് രാവിലെ രാജ്ഭവനിൽ നടക്കേണ്ടിയിരുന്നത്. കൃഷിമന്ത്രിയുടെ സാന്നിധ്യത്തിൽ ഗവർണ്ണർ മുഖ്യാതിഥി. പക്ഷെ പരിപാടി നടക്കേണ്ട രാജ്ഭവൻ സെൻട്രൽ ഹാളിളെ വെച്ച ഭാരതാംബയുടെ ഫോട്ടോയെ ചൊല്ലി കൃഷിവകുപ്പ് പ്രശ്നം സൃഷ്ടിച്ചു. ഇന്നലെ രാത്രി വേദി പരിശോധിച്ച കൃഷി വകുപ്പ് ഉദ്യോഗസ്ഥർ ഫോട്ടോയുടെ കാര്യം മന്ത്രിയെ അറിയിച്ചു. കൃഷിമന്ത്രി ഫോട്ടോ മാറ്റാൻ രാജ്ഭവനോട് ആവശ്യപ്പെട്ടു. പകരം ഭാരതാംബയുടെ മറ്റൊരു ചിത്രം വെക്കണമെന്ന് മന്ത്രിയുടെ ഓഫീസ് നിബന്ധന വച്ചെങ്കിലും നിലവിലെ ഫോട്ടോ മാറ്റാൻ ഗവർണ്ണർ തയ്യാറായില്ല. ഇതോടെ മുഖ്യമന്ത്രിയുമായി ആലോചിച്ച് കൃഷിമന്ത്രി പരിപാടി ഉപേക്ഷിച്ചു.