ഇപ്പോൾ ‘അമ്മ’യിൽ അംഗമല്ല! സംഘടനയിലെ പുതിയ ഭാരവാഹികളെക്കുറിച്ച് പ്രതികരിക്കാനില്ലെന്ന് ഭാവന

കൊച്ചി: മലയാള സിനിമയിലെ താരസംഘടനയായ ‘അമ്മ’യുടെ നേതൃത്വത്തിൽ വനിതകൾക്ക് പ്രാധാന്യം നൽകിക്കൊണ്ട് പുതിയ ഭരണസമിതി അധികാരമേറ്റതിന് പിന്നാലെ, വിഷയത്തിൽ പ്രതികരണവുമായി നടി ഭാവന രംഗത്ത്. താൻ നിലവിൽ ‘അമ്മ’യിൽ അംഗമല്ലാത്തതിനാൽ പുതിയ ഭാരവാഹികളെക്കുറിച്ച് പ്രതികരിക്കാനില്ലെന്ന് ഭാവന വ്യക്തമാക്കി. അതേസമയം, സംഘടനയിൽ നിന്ന് രാജി വെച്ച് പോയവർക്ക് തിരികെ വരാൻ തടസ്സമില്ലെന്നും അതിന് വ്യക്തമായ നിയമങ്ങളും ചട്ടങ്ങളുമുണ്ടെന്നും പുതിയ പ്രസിഡന്റ് ശ്വേതാ മേനോൻ മാദ്ധ്യമങ്ങളോട് പ്രതികരിച്ചിരുന്നു.

“രാജി വെച്ചുപോയവരെ തിരിച്ചെത്തിക്കുന്നത് ഇപ്പോൾ ‘അമ്മ’യുടെ അടിയന്തര അജണ്ടയിലില്ല. അവർക്ക് തിരികെ വരാൻ സംഘടനയുടെ നിയമങ്ങളും ചട്ടങ്ങളും അനുസരിച്ച് സാധിക്കും. രാജി വെച്ചവർ തിരിച്ചുവരണമെന്നാണ് ഞാനുൾപ്പെടെയുള്ള എല്ലാ അംഗങ്ങളുടെയും ആഗ്രഹം. പ്രസിഡന്റ് എന്ന നിലയിൽ അതിനുവേണ്ട എല്ലാ മുൻകൈകളും എടുക്കും,” ശ്വേത പറഞ്ഞു.

നടി ആക്രമിക്കപ്പെട്ട സംഭവത്തിൽ കുറ്റാരോപിതനായ നടനെ സംരക്ഷിക്കാൻ ശ്രമിച്ചുവെന്നാരോപിച്ചാണ് 2018 ൽ ഭാവന അമ്മയിൽ നിന്ന് രാജി വച്ചത്.ഭാവനയ്ക്ക് പിന്തുണ പ്രഖ്യാപിച്ച് റിമ കല്ലിങ്കൽ, ഗീതുമോഹൻദാസ്, രമ്യ നമ്പീശൻ എന്നിവരും അമ്മയില്‍ നിന്ന് അന്ന് രാജി വച്ചിരുന്നു.

ഇന്നലെ നടന്ന ‘അമ്മ’യുടെ തെരഞ്ഞെടുപ്പിൽ ശ്വേതാ മേനോൻ പ്രസിഡന്റായും കുക്കു പരമേശ്വരൻ ജനറൽ സെക്രട്ടറിയായും തെരഞ്ഞെടുക്കപ്പെട്ടിരുന്നു. സംഘടനയുടെ ചരിത്രത്തിൽ ആദ്യമായാണ് വനിതകൾ ഈ ഉന്നത സ്ഥാനങ്ങളിലേക്ക് എത്തുന്നത്. വൈസ് പ്രസിഡന്റായി ലക്ഷ്മിപ്രിയയും ജോയിന്റ് സെക്രട്ടറിയായി അൻസിബ ഹസനും എതിരില്ലാതെ തിരഞ്ഞെടുക്കപ്പെട്ടിരുന്നു. സ്ത്രീകൾക്ക് കൂടുതൽ പ്രാധാന്യം നൽകിക്കൊണ്ടുള്ള പുതിയ ഭരണസമിതി, സംഘടനയുടെ ഭാവി പ്രവർത്തനങ്ങളിൽ നിർണായകമായ മാറ്റങ്ങൾ കൊണ്ടുവരുമെന്ന് പ്രതീക്ഷിക്കപ്പെടുന്നു. സംഘടനയുടെ ആഭ്യന്തര പ്രശ്നങ്ങളും വിവാദങ്ങളും നിലനിൽക്കുന്ന സാഹചര്യത്തിൽ പുതിയ നേതൃത്വത്തിന്റെ നിലപാടുകൾക്ക് പ്രാധാന്യമേറുകയാണ്.