ഭോജ്പുരി സിനിമയിലെ ‘ഡ്രീം ഗേൾ’ നടി ആകാംക്ഷാ ഡൂബേ ഹോട്ടൽ മുറിയിൽ മരിച്ച നിലയിൽ; ആത്മഹത്യയെന്ന് പ്രാഥമിക നിഗമനം

വാരണാസി : ഭോജ്പുരി സിനിമയിലെ ‘ഡ്രീം ഗേൾ’ എന്നറിയപ്പെടുന്ന നടി ആകാംക്ഷാ ഡൂബേ (25)യെ വാരണാസിയിൽ ഹോട്ടൽമുറിയിൽ മരിച്ചനിലയിൽ കണ്ടെത്തി. പുതിയ സിനിമയുടെ ചിത്രീകരണത്തിനായാണ് ഇവർ വാരണാസിയിലെത്തിയിരുന്നത്. ആത്മഹത്യയാണെന്നാണ് പോലീസിന്റെ പ്രാഥമിക അന്വേഷണത്തിൽ കണ്ടെത്തിയിരിക്കുന്നത്.

മരണത്തിന് ഏതാനും മണിക്കൂറുകൾക്ക് മുമ്പ് ഹിലോരേ മാരേ എന്ന പ്രശസ്ത ഭോജ്പുരി ​ഗാനത്തിനൊപ്പം ചുവടുവെയ്ക്കുന്ന ഒരു വീഡിയോ അവർ തന്റെ ഇൻസ്റ്റ​ഗ്രാം അക്കൗണ്ടിൽ പോസ്റ്റ് ചെയ്തിരുന്നു.

യേ ആരാ കഭീ ഹരാ നഹീ എന്ന് തുടങ്ങുന്ന തന്റെ പുതിയ ​ഗാനം പുറത്തുവന്ന അതേദിവസം തന്നെയാണ് ആകാംക്ഷയുടെ മരണവും സംഭവിച്ചത്. ഭോജ്പുരിയിൽ നിരവധി ആരാധകരുള്ള നടികൂടിയാണ് ആകാംക്ഷ.

മുഝ് സേ ശാദി കരോ​ഗി, വീരോം കി വീർ, ഫൈറ്റർ കിങ്, കസം പൈദാ കർനേ കി 2 തുടങ്ങി നിരവധി ജനപ്രിയ ചിത്രങ്ങളിൽ താരം അഭിനയിച്ചു. ഭോജ്പുരി നടനായ സമർ സിം​ഗുമായുള്ള ബന്ധത്തേക്കുറിച്ച് ഇക്കഴിഞ്ഞ വാലന്റൈൻസ് ദിനത്തിലാണ് ആകാംക്ഷ വെളിപ്പെടുത്തിയത് .