വീണ്ടും കരിപ്പൂർ വിമാനത്താവളത്തിൽ വൻ സ്വർണ്ണവേട്ട;രണ്ട് കോടി രൂപ വിലമതിക്കുന്ന സ്വർണം എയർ കസ്റ്റംസ് പിടികൂടി;ജിദ്ദയിൽ നിന്നെത്തിയ റഹ്മാന്റെ പക്കൽ നിന്നും 1107 ഗ്രാം സ്വർണ്ണം പിടിച്ചെടുത്തു

കോഴിക്കോട്: കരിപ്പൂർ വിമാനത്താവളത്തിൽ വൻ സ്വർണ്ണവേട്ട. കോഴിക്കോട് വിമാനത്താവളം വഴി നാല് വ്യത്യസ്ത കേസുകളിലായി കടത്താൻ ശ്രമിച്ച രണ്ട് കോടിയോളം രൂപ വിലമതിക്കുന്ന 3.5 കിലോ സ്വർണ്ണം എയർ കസ്റ്റംസ് ഇന്റലിജൻസ് ഉദ്യോഗസ്ഥർ പിടികൂടി. ഇന്ന് അതിരാവിലെയാണ് സംഭവം നടക്കുന്നത്.

ജിദ്ദയിൽ നിന്നെത്തിയ മലപ്പുറം സ്വദേശി റഹ്മാന്റെ പക്കൽ നിന്നും 1107 ഗ്രാം ഭാരമുള്ള സ്വർണ്ണ മിശ്രിതം എയർ കസ്റ്റംസ് ഇന്റലിജൻസ് ഉദ്യോഗസ്ഥർ പിടികൂടി. സ്വർണ്ണ മിശ്രിതം നാല് ക്യാപ്‌സ്യൂളുകളാക്കിയാണ് റഹ്മാൻ കടത്താൻ ശ്രമിച്ചത്. മലപ്പുറം കരുളായി സ്വദേശി മുഹമ്മദ് ഉവൈസിനും സ്വർണ്ണ മിശ്രിതം ശരീരത്തിനുള്ളിൽ നാല് ക്യാപ്‌സ്യൂളുകളാക്കിയാണ് കടത്താൻ ശ്രമിച്ചത്.

ഇതുകൂടാതെ, അബുദാബിയിൽ നിന്നെത്തിയ കോഴിക്കോട് കൂടരഞ്ഞി സ്വദേശി ഉണ്ണിച്ചാൽ മീത്തൽ വിജിത്തിന്റെ പക്കൽ നിന്നും 1061 ഗ്രാം ഭാരമുള്ള സ്വർണം മിശ്രിതം എയർ കസ്റ്റംസ് ഇന്റലിജൻസ് ഉദ്യോഗസ്ഥർ പിടിച്ചെടുത്തു. ശരീരത്തിലും സോക്‌സിലുമായി നാല് ക്യാപ്സ്യൂളുകളാക്കിയാണ് വിജിത്ത് സ്വർണ്ണം കടത്താൻ ശ്രമിച്ചത്. ദുബായിൽ നിന്നെത്തിയ മലപ്പുറം സ്വദേശി ഒസ്സൻകുന്നത്ത് ഷഫീഖിന്റെ കൈ ലഗേജിൽ നിന്ന് 9.01 ഗ്രാം സ്വർണം ഒളിപ്പിച്ച നിലയിലാണ് എയർ കസ്റ്റംസ് ഇന്റലിജൻസ് ഉദ്യോഗസ്ഥർ കണ്ടെത്തിയത്. പിടിച്ചെടുത്ത സ്വർണ മിശ്രിതത്തിൽ നിന്ന് സ്വർണം വേർതിരിച്ചെടുത്ത ശേഷം തുടർനടപടി സ്വീകരിക്കുമെന്ന് ഉദ്യോഗസ്ഥർ അറിയിച്ചു.