ഇന്ന് മുതൽ ട്വിറ്ററിലെ പരമ്പരാഗത ബ്ലൂ ടിക്കുകൾ ഒഴിവാക്കും; ഇനി ബ്ലൂ ടിക്ക് ലഭിക്കാൻ പണം നൽകണം,സുപ്രധാന നടപടിയുമായി എലോൺ മസ്‌ക്

വീണ്ടും നവീകരണത്തിനൊരുങ്ങി ട്വിറ്റർ.ട്വിറ്ററിലെ പരമ്പരാഗത ബ്ലൂ ടിക്കുകൾ ഒഴിവാക്കുന്നതുമായി ബന്ധപ്പെട്ട നടപടി ഇന്ന് പ്രാബല്യത്തിൽ വരും.ഇനി മുതൽ പ്രൊഫൈലുകൾക്ക് ബ്ലൂ ടിക്ക് ലഭിക്കാൻ പണം നൽകണം. ഏപ്രിൽ ഒന്ന് മുതൽ തന്നെ ബ്ലൂ ടിക്കുകൾ ഒഴിവാക്കുമെന്ന് ട്വിറ്റർ പറഞ്ഞെങ്കിലും ചില അക്കൗണ്ടുകൾക്ക് മാത്രമേ ഇത് ബാധകമായിരുന്നുള്ളൂ. എന്നാൽ, പരമ്പരാഗത ബ്ലൂ ടിക്കുകൾ ഒഴിവാക്കും എന്ന നിലപാടിൽ തന്നെയാണ് ട്വിറ്റർ.

എലോൺ മസ്‌ക് ട്വിറ്റർ ഏറ്റെടുത്ത ശേഷം നിരവധി പരിഷ്കാരങ്ങളും നടപടികളുമാണ് ട്വിറ്ററിൽ കൊണ്ട് വന്നത്.ട്വിറ്ററില്‍ നിങ്ങളുടെ അക്കൗണ്ട് വെരിഫൈഡ് ആണോ എന്ന് ഉറപ്പിക്കുന്നതിന് ട്വിറ്റര്‍ നല്‍കി വരുന്ന അടയാളമാണ് നീല നിറത്തിലുള്ള ശരി അടയാളം. എന്നാൽ ഇനിമുതൽ ഈ അടയാളം കാണാൻ സാധിക്കില്ലെന്നാണ് അറിയാൻ കഴിയുന്നത്.

അതേസമയം കഴിഞ്ഞദിവസമാണ് അനൗപചാരികമായി ബ്രാൻഡ് പുനർനാമകരണം ചെയ്തത്.പുറത്തുവരുന്ന റിപ്പോർട്ടുകൾ പ്രകാരം ട്വിറ്റർ എന്ന ഇംഗ്ലീഷിൽ എഴുതിയ ബോർഡിൽ നിന്നും ‘ഡബ്ല്യു’ എന്ന ഇംഗ്ലീഷ് അക്ഷരം എടുത്ത് മാറ്റുകയാണ് ഇലോൺ മസ്ക് ചെയ്തിരിക്കുന്നത്. ട്വിറ്ററിന്റെ സാൻ ഫ്രാൻസിസ്കോ ആസ്ഥാനത്തെ ഓഫീസിന് മുകളിലുള്ള ബോർഡിൽ നിന്നാണ് ഡബ്ല്യു എന്ന അക്ഷരം എടുത്ത് മാറ്റിയത്.ഡബ്ല്യു എന്ന അക്ഷരം എടുത്തു മാറ്റിയതോടെ ട്വിറ്റർ എന്ന പേരിനു പകരം ടിറ്റർ എന്നാണ് വായിക്കുന്നത്.