തിരുവനന്തപുരത്തെ മുൾമുനയിൽ നിർത്തി ബോംബ് ഭീഷണി; ഇ മെയിൽ സന്ദേശമെത്തിയത് യാക്കൂബ് മേമന്റെ പേരിൽ; ഇസ്ലാമിക തീവ്രവാദികളുടെ പേരിൽ ഭീഷണിയെത്തുന്നത് 48 മണിക്കൂറിൽ ഇത് രണ്ടാം തവണ

തിരുവനന്തപുരം: തലസ്ഥാനനഗരത്തെ മുൾമുനയിൽ നിർത്തി ബോംബ് ഭീഷണി. ഉച്ചയ്ക്ക് രണ്ടുമണിയോടെ മനുഷ്യബോംബ് പൊട്ടിത്തെറിക്കുമെന്നായിരുന്നു ഭീഷണി. ഹോട്ടൽ ഫോർട്ട് മാനറിൽ ബോംബ് വെച്ചിട്ടുണ്ടെന്നാണ് സന്ദേശമെത്തിയത്. എന്നാൽ പരിശോധനയിൽ ഒന്നും കണ്ടെത്താൻ സാധിച്ചില്ല. മുംബൈ സ്‌ഫോടനക്കേസ് പ്രതി യാക്കൂബ് മേമന്റെ പേരിലാണ് ഇ-മെയിൽ സന്ദേശമെത്തിയത്. മാദ്ധ്യമ സ്ഥാപനങ്ങളിലുൾപ്പെടെ രാവിലെയോടെയാണ് ഈ സന്ദേശമെത്തിയത്.

കഴിഞ്ഞ ദിവസം പൂക്കോട് വെറ്റിറിനറി സർവ്വകലാശയ്ക്കും ബോംബ് ഭീഷണി എത്തിയിരുന്നു. പാർലമെൻ്റ് ആക്രമണക്കേസിലെ പ്രതി അഫ്‌സൽ ഗുരുവിനെ തൂക്കിലേറ്റിയതിന്റെ വാർഷികത്തിൽ പ്രതികാരം ചെയ്യുമെന്നായിരുന്നു ഭീഷണി. സർവ്വകലാശാല വൈസ് ചാൻസലർക്കും രജിസ്‌ട്രാർക്കും ഇ-മെയിൽ സന്ദേശം വഴിയാണ് ബോംബ് ഭീഷണി എത്തിയത്.നിവേദ്യ എന്നു പേരുള്ള ഐഡിയിൽ നിന്നായിരുന്നു സന്ദേശം എത്തിയത്.

അടുത്തടുത്ത ദിവസങ്ങളിൽ, കൊല്ലപ്പെട്ട ഇസ്ലാമിക തീവ്രവാദികളുടെ പേരിൽ ബോംബ് ഭീഷണിയെത്തിയതിനെ പോലീസ് ഗൗരവത്തോടെയാണ് കാണുന്നത്. നിരവധി നിരപരാധികളുടെ ജീവനെടുത്ത മുംബൈ സ്ഫോടനങ്ങളുടെ മുഖ്യ സൂത്രധാരന്മാരിൽ ഒരാളായിരുന്നു യാക്കൂബ് മേമൻ. 2015 ജൂലൈ 30 ന് ഇയാളെ തൂക്കിലേറ്റുകയായിരുന്നു. ഇന്ത്യൻ പാർലമെന്റ് ആക്രമിച്ച് രാഷ്ട്രീയ നേതൃത്വത്തെ അപായപ്പെടുത്താനാണ് അഫ്‌സൽ ഗുരു ശ്രമിച്ചത്. 2013 ഫെബ്രുവരി 9 ന് ഇയാളെയും വധശിക്ഷയ്ക്ക് വിധേയനാക്കി.