കെ റെയിൽ യാഥാർത്ഥ്യമാക്കാൻ നീക്കങ്ങൾ ശക്തം: മുഖ്യമന്ത്രി നാളെ പ്രധാനമന്ത്രിയെ കാണും: പദ്ധതിയുടെ അന്തിമ വിധി കാത്ത് ജനങ്ങൾ

ദില്ലി: സംസ്ഥാനത്ത് കെ റെയിൽ പ്രതിഷേധ സമരം രൂക്ഷമാകുന്നതിനിടെ പദ്ധതിയുമായി ബന്ധപ്പെട്ട നടപടികൾ ഉടനെ നടപ്പിലാക്കാനുള്ള നീക്കവുമായി സർക്കാർ. ഇതേതുടർന്ന് മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്രമോദിയുമായി നാളെ കൂടിക്കാഴ്ച നടത്തിയേക്കും.

നാളെ ഉച്ചയ്ക്ക് മുൻപായി മുഖ്യമന്ത്രിയും പ്രധാനമന്ത്രിയും തമ്മിലുള്ള കൂടിക്കാഴ്ച നടക്കുമെന്നാണ് വിവരം. കെ റെയിൽ ഉൾപ്പെടെയുള്ള വിഷയങ്ങൾ സംസ്ഥാനത്ത് വലിയ ചർച്ചയായിരിക്കുന്ന ഘട്ടത്തില്‍ ഇരുവരുടെയും കൂടിക്കാഴ്ച നിര്‍ണായകമാകും. മാത്രമല്ല കൂടിക്കാഴ്ചയില്‍ കെ റെയിലടക്കമുള്ള വിഷയങ്ങൾ ചര്‍ച്ചയാകാന്‍ സാധ്യതയുണ്ട് എന്നാണ് സൂചന.

അതേസമയം, കേരളത്തിന്റെ വിവിധ ഭാഗങ്ങളിലായി പദ്ധതിക്കെതിരായ പ്രതിഷേധം ശക്തമാവുകയാണ്. ഇതിനിടയിലും പദ്ധതിയുമായി മുന്നോട്ട് തന്നെ പോകുമെന്ന് മുഖ്യമന്ത്രിയും കോടിയേരി ബാലകൃഷ്ണനും വ്യക്തമാക്കി കഴിഞ്ഞു.

ഇതിനിടെ കെ റെയിലുമായി ബന്ധപ്പെട്ട് മുൻ മന്ത്രിയും കോൺഗ്രസ് എം എൽ എ യുമായ തിരുവഞ്ചൂർ രാധാകൃഷ്ണൻ മന്ത്രി സജി ചെറിയാനെതിരെ ഗുരുതര ആരോപണവുമായി രംഗത്ത് എത്തിയിരുന്നു. മന്ത്രിയുടെ വീട് സംരക്ഷിക്കാൻ ചെങ്ങന്നൂരിൽ കെ റെയിൽ അലൈൻമെന്റിൽ മാറ്റം വരുത്തിയെന്നാണ് തിരുവഞ്ചൂർ ആരോപിച്ചത്. ഇതിനെതിരെ സജി ചെറിയാൻ രംഗത്ത് എത്തുകയും ചെയ്‌തിരുന്നു.