അഞ്ചു നൂറ്റാണ്ടുകളുടെ ത്യാഗോജ്ജ്വല പോരാട്ടങ്ങളുടെ വിജയം അടയാളപ്പെടുത്തി ഇന്ന് അയോദ്ധ്യയിൽ പ്രാണപ്രതിഷ്ഠ, പ്രധാനമന്ത്രി രാവിലെ അയോദ്ധ്യയിലെത്തും, നാടെങ്ങും വൻ ആഘോഷ പരിപാടികൾ

അധിനിവേശത്തിന്റെ അടയാളങ്ങൾ മായ്ച്ച്, സ്വാതന്ത്ര്യത്തിന്റെയും സ്വാഭിമാനത്തിന്റെയും ഗതകാല പ്രൗഢി വീണ്ടെടുത്ത് ഭാരതം. അഞ്ചു നൂറ്റാണ്ടുകളുടെ പോരാട്ട വിജയം അടയാളപ്പെടുത്തി ഇന്ന് അയോദ്ധ്യയിൽ പ്രാണപ്രതിഷ്ഠ. തലമുറകളിലേക്ക് അണയാതെ പകർന്ന് നൽകിയ സമരവീര്യത്തിന് അഭിവാദ്യം അർപ്പിച്ച് ഇന്ന് ശ്രീരാമ ജന്മഭൂമിയിൽ ചരിത്ര വിജയത്തിന്റെ കാവി പതാക ഉയരും. നരേന്ദ്രമോദി ഇന്ന് അയോദ്ധ്യയിൽ സ്ഥാപിച്ചിരിക്കുന്ന ബാലകരാമന്റെ വിഗ്രഹത്തിൽ പ്രാണപ്രതിഷ്ഠ നടത്തുമ്പോൾ രാജ്യമോട്ടാകെ ഉത്സവ ലഹരിയിലാകും. ഓരോ ഗ്രാമത്തിലും ക്ഷേത്രങ്ങളിൽ പ്രത്യേക പൂജകളും ആഘോഷ പരിപാടികളും നടക്കും. ഭാരതം രാമ മന്ത്ര മുഖരിതമാകും

ശ്രീരാമക്ഷേത്രത്തിലെ പ്രാണ പ്രതിഷ്ഠ ചടങ്ങുകൾ ഇന്ന് 12.20 മുതൽ നടക്കും. പ്രധാനമന്ത്രിയുടെ അദ്ധ്യക്ഷതയിൽ‌ രാംലല്ല വി​ഗ്രഹം രാമക്ഷേത്രത്തിന്റെ ശ്രീകോവിലിൽ പ്രതിഷ്ഠിക്കും. പ്രധാന യജമാന പദം വഹിക്കുന്ന അദ്ദേഹം ഇന്ന് രാവിലെ 10.55-ഓടെയാകും അയോദ്ധ്യയിലെത്തുക. ഏകദേശം അഞ്ച് മണിക്കൂറുകളോളം അദ്ദേഹം രാമജന്മഭൂമിയിൽ തങ്ങും..

84 സെക്കൻഡാണ് പ്രാണ പ്രതിഷ്ഠാ മുഹൂർത്തം. ഉച്ചയ്‌ക്ക് 12:29:8 മുതൽ 12:30: 32 നാഴിക വരെയുള്ള പവിത്രമായ മുഹൂർത്തത്തിലാകും രാംലല്ലയുടെ പ്രാണപ്രതിഷ്ഠ ചടങ്ങ് നടക്കുന്നത്.പ്രതിഷ്ഠാ കർമ്മത്തിനു ശേഷം വിതരണം ചെയ്യാനായി 20,000 പായ്ക്കറ്റ് മഹാപ്രസാദം തയ്യാറായിട്ടുണ്ട്.പ്രാണപ്രതിഷ്ഠയുടെ ഭാഗമായി അയോദ്ധ്യയിൽ പഴുതടച്ച സുരക്ഷയാണ് ഒരുക്കിയിട്ടുള്ളത്