ജയിലിൽ ഓഫീസ് തുടങ്ങാൻ കോടതിയിൽ അനുമതി തേടും; കെജ്‌രിവാളിന്റെ സ്ഥാനത്ത് പകരം വയ്ക്കാൻ മറ്റാരുമില്ലെന്ന് പഞ്ചാബ് മുഖ്യമന്ത്രി

ചണ്ഡീഗഡ്: മദ്യനയ അഴിമതി കേസിൽ ഇ ഡി അറസ്റ്റ് ചെയ്ത് ജയിലിൽ കഴിയുന്ന ദില്ലി മുഖ്യമന്ത്രി അരവിന്ദ് കെജ്‌രിവാളിന് ജയിലിൽ ഓഫീസ് തുടങ്ങാൻ കോടതിയോട് അനുമതി തേടുമെന്ന് പഞ്ചാബ് മുഖ്യമന്ത്രി ഭഗവന്ത് മൻ. ജയിലിൽ ഇരുന്ന് സർക്കാരിനെ നയിക്കാൻ കഴിയില്ലെന്ന് എവിടെയും എഴുതി വച്ചിട്ടില്ല. കുറ്റക്കാരനാണെന്ന് കോടതി കണ്ടെത്തുന്നതുവരെ ജയിലിൽ ഇരുന്ന് ജോലി തുടരാനുള്ള അനുമതി നിയമം അനുശാസിക്കുന്നുണ്ടെന്നും പഞ്ചാബ് മുഖ്യമന്ത്രി പറഞ്ഞു. ആംആദ്മി പാർട്ടിയിൽ കെജ്‌രിവാളിന് പകരക്കാരനില്ലെന്നും ഭ​ഗവന്ത് മൻ കൂട്ടിച്ചേർത്തു. ദേശീയ മാദ്ധ്യമത്തിന് നൽകിയ പ്രത്യേക അഭിമുഖത്തിലാണ് പഞ്ചാബ് മുഖ്യമന്ത്രിയുടെ പ്രതികരണം.

ദില്ലി മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിച്ചെന്ന കേസിൽ വ്യാഴാഴ്ച രാത്രിയാണ് ഇ ഡി ദില്ലി മുഖ്യമന്ത്രി അരവിന്ദ് കെജ്‌രിവാളിനെ അറസ്റ്റ് ചെയ്തത്. വെള്ളിയാഴ്ച ദില്ലിയിലെ റോസ് അവന്യൂ കോടതിയിൽ ഹാജരാക്കിയ അരവിന്ദ് കെജ്‌രിവാളിനെ കോടതി മാർച്ച് 28 വരെ ഇഡി കസ്റ്റഡിയിൽ റിമാൻഡ് ചെയ്തു.