നയന സൂര്യയുടെ മരണം:ക്രൈംബ്രാഞ്ച് എസ്പി മധുസൂദനന്റെ നേതൃത്വത്തിൽ പുനഃരന്വേഷണം

തിരുവനന്തപുരം : തലസ്ഥാനത്തെ വാടക വീട്ടിൽ യുവ സംവിധായിക നയന സൂര്യ മരണപ്പെട്ട സംഭവം ക്രൈംബ്രാഞ്ച് എസ്പി മധുസൂദനന്റെ നേതൃത്വത്തിൽ പുനഃരന്വേഷിക്കും . ഡിവൈഎസ്പി ജലീൽ തോട്ടത്തിലാണ് കേസിന്റെ അന്വേഷണ ഉദ്യോഗസ്ഥൻ. നയനയുടെ മരണം കൊലപാതകമാണെന്ന ആരോപണം ഉയർന്ന സാഹചര്യത്തിലാണു ഡിജിപി ക്രൈംബ്രാഞ്ച് അന്വേഷണത്തിനു നിർദേശിച്ചത്.

2019 ഫെബ്രുവരി 23നാണ് നയനയെ ആൽത്തറ ജംക്‌ഷനിലുള്ള വാടക വീട്ടിൽ മരിച്ചനിലയിൽ കണ്ടെത്തിയത്. കഴുത്തിലും ശരീരഭാഗങ്ങളിലും ക്ഷതമുണ്ടെന്ന് പോസ്റ്റുമോർട്ടം റിപ്പോർട്ടിൽ വ്യക്തമാക്കിയിരുന്നു. എന്നാൽ ആത്മഹത്യയായി കണക്കാക്കി കേസ് പൊലീസ് അവസാനിപ്പിക്കുകയാണ് ചെയ്തത്.

സിറ്റി പൊലീസ് കമ്മിഷണർ നയനയുടെ ബന്ധുക്കളിൽനിന്ന് മൊഴിയെടുത്തു. പഴയ കേസ് ഫയലുകൾ പരിശോധിച്ചപ്പോൾ ഉദ്യോഗസ്ഥരുടെ ഭാഗത്തു നിന്നുള്ള ഗുരുതര വീഴ്ച കണ്ടെത്തിയിരുന്നു. തുടർന്ന്, കൊലപാതക സാധ്യതയുണ്ടെന്ന് എഡിജിപി എം.ആർ.അജിത് കുമാറിന് റിപ്പോർട്ട് നൽകി.കമ്മിഷണർ ഡിജിപിക്ക് കൈമാറിയ റിപ്പോർട്ടിന്റെ അടിസ്ഥാനത്തിലാണ് ക്രൈംബ്രാഞ്ച് അന്വേഷണത്തിന് ഉത്തരവിട്ടത്.