വി.എസ് ഉമ്മന്‍ ചാണ്ടിക്ക് 10 ലക്ഷം നൽകണം; മാനനഷ്ട കേസിൽ നഷ്ടപരിഹാരം നൽകാൻ ഉത്തരവ് വിധിച്ച് കോടതി

തിരുവനന്തപുരം: വി.എസ് അച്യുതാനന്ദനെതിരായ അപകീർത്തിക്കേസിൽ ഉമ്മൻചാണ്ടിക്ക് അനുകൂല വിധി. വിഎസ് ഉമ്മന്‍ചാണ്ടിക്ക് 10,10,000 രൂപ നഷ്ടപരിഹാരം നല്‍കണമെന്ന് തിരുവനന്തപുരം പ്രിന്‍സിപ്പല്‍ സബ് കോടതി ഉത്തരവിട്ടു. സോളാർ വിവാദവുമായി ബന്ധപ്പെട്ട് ഉമ്മൻചാണ്ടിക്കെതിരെ വി.എസ് അച്യുതാനന്ദൻ നടത്തിയ അപകീർത്തികരമായ പ്രസ്‌താവനയാണ് കേസിന് ആസ്‌പദമായ സംഭവം.

ഒരു മാധ്യമത്തിന് പ്രതിപക്ഷ നേതാവായിരുന്ന വിഎസ് നൽകിയ അഭിമുഖത്തിലായിരുന്നു മുഖ്യമന്ത്രിയായിരുന്ന ഉമ്മൻ ചാണ്ടിക്കെതിരെ ആരോപണം ഉന്നയിച്ചത്. ഉമ്മൻ ചാണ്ടിയുടെ നേതൃത്വത്തിൽ ഒരു കമ്പനിയുണ്ടാക്കി തട്ടിപ്പ് നടത്തിയെന്നായിരുന്നു ആരോപണം. 2013 ലാണ് കേസിനാസ്പദമായ സംഭവം നടന്നത്. 10,10000 രൂപ നഷ്‌ടപരിഹാരമായി ആവശ്യപ്പെട്ട് ഉമ്മൻ ചാണ്ടി കോടതിയിൽ 2014നാണ് ഹർജി നൽകിയിരുന്നത്. നഷ്‌ടപരിഹാര തുകയോടൊപ്പം 6% ബാങ്ക് പലിശയും എതിർകക്ഷിയായ വി.എസ് നൽകണം.