ട്രെയിൻ അട്ടിമറി ശ്രമം: മദ്ധ്യപ്രദേശിൽ റെയിൽവേ ജീവനക്കാരൻ സാബിർ അറസ്റ്റിലായി; ലക്ഷ്യംവച്ചത് കേരളത്തിലേക്കുള്ള സൈനിക സ്പെഷ്യൽ ട്രെയിൻ !

മദ്ധ്യപ്രദേശിൽ സൈനികരുടെ സ്പെഷ്യൽ ട്രെയിൻ പാളംതെറ്റിക്കാൻ ശ്രമിച്ച കേസിൽ റെയിൽവേ ജീവനക്കാരൻ സാബിർ അറസ്റ്റിൽ. ട്രെയിൻ കടന്നുപോകുന്ന സമയത്ത് ട്രാക്കിൽ പത്തിലധികം ഡിറ്റനേറ്ററുകൾ പൊട്ടിത്തെറിക്കുകയായിരുന്നു. സ്ഫോടനത്തെ തുടർന്ന് പിടിച്ചിട്ട ട്രെയിൻ പരിശോധനകൾക്ക് ശേഷം യാത്ര തുടരുകയായിരുന്നു. റെയിൽവേ തന്നെ ഉപയോഗിക്കുന്ന ഡിറ്റനേറ്ററുകളാണ് സാബിർ മോഷ്ടിച്ച് പാളത്തിൽ സ്ഥാപിച്ചത്. സൈനികരുമായി കേരളത്തിലേക്ക് വന്ന ട്രെയിനിന് നേരെയാണ് ആക്രമണ ശ്രമമുണ്ടായത്. അതുകൊണ്ടുതന്നെ പോലീസും ആർ പി എഫും അന്വേഷണം ഊർജ്ജിതമാക്കിയിരുന്നു. അറസ്റ്റിലായ സാബിറിന്റെ ലക്ഷ്യങ്ങളും ക്രിമിനൽ പശ്ചാത്തലവും ബന്ധങ്ങളും ഇപ്പോൾ പോലീസ് അന്വേഷിക്കുകയാണ്.

കഴിഞ്ഞ മൂന്ന് ആഴ്‌ചയ്‌ക്കിടെ 10 അട്ടിമറി ശ്രമങ്ങളാണ് രാജ്യത്ത് ട്രെയിനുകൾക്ക് നേരെ നടന്നത്. മദ്ധ്യപ്രദേശിലെ ഖണ്ഡ്വാ ജില്ലയിലാണ് സൈനിക ട്രെയിനിന് നേരെ കഴിഞ്ഞ ബുധനാഴ്ച ആക്രമണമുണ്ടായത്. സ്‌ഫോടനത്തിന് ഉപയോഗിച്ച ഡിറ്റനേറ്ററുകൾ സുരക്ഷാ ഡ്രില്ലുകൾക്കും മറ്റുമായി റെയിൽവേ തന്നെ ഉപയോഗിക്കുന്നതാണ്. പ്രത്യേക സാഹചര്യങ്ങളിൽ ലോക്കോ പൈലറ്റുമാർക്ക് മുന്നറിയിപ്പ് നൽകാനായി ഡിറ്റനേറ്ററുകൾ ഉപയോഗിക്കുന്നു. ശബ്ദവും പുകയും ഉണ്ടാകുമെന്നല്ലാതെ ഇത് അപകടകാരികളില്ല. പക്ഷെ സൈനിക ട്രെയിൻ കടന്നുപികുമ്പോൾ ഇത് പാളത്തിൽ സ്ഥാപിച്ചതിൽ ദുരൂഹതയുണ്ട്. ഇതാണ് ഇപ്പോൾ പോലീസും ആർ പി എഫും അന്വേഷണ വിധേയമാക്കിയത്.