കടുത്ത സാമ്പത്തിക പ്രതിസന്ധിക്കിടയിലുംയുവജന കമ്മിഷൻ അധ്യക്ഷ ചിന്ത ജെറോമിന്റെ ശമ്പളംമുൻകാല പ്രാബല്യത്തോടെ ഒരു ലക്ഷംരൂപയാക്കാൻ ധനവകുപ്പ്

തിരുവനന്തപുരം: യുവജന കമ്മിഷൻ അധ്യക്ഷ ചിന്ത ജെറോമിന്റെ ശമ്പളം 50,000 രൂപയായി ക്രമീകരിച്ച് യുവജനകാര്യ വകുപ്പ് ഉത്തരവ് ഇറക്കി മൂന്നു മാസം കഴിയുന്നതിനു മുൻപേ ഒരു വർഷത്തെ ശമ്പളം മുൻകാല പ്രാബല്യത്തോടെ ഒരു ലക്ഷംരൂപയാക്കി ഉയർത്താൻ ധനവകുപ്പ് തീരുമാനിച്ചത് വിവാദമാകുന്നു . ചിന്ത ജെറോം ചുമതലയേറ്റ 2016 ഒക്ടോബർ 4 മുതൽ 2018 മേയ് 25വരെയുള്ള ശമ്പളം 50,000രൂപയായി ക്രമീകരിച്ച് കായിക യുവജനകാര്യ (ബി) വകുപ്പ് 2022 സെപ്റ്റംബർ 26നാണു ഉത്തരവിറക്കിയത്. ഈ കാലയളവിലെ ശമ്പളം മുൻകാല പ്രാബല്യത്തോടെ വർധിപ്പിക്കണമെന്ന ചിന്തയുടെ ആവശ്യം വകുപ്പ് തള്ളിയിരുന്നു. എന്നാൽ, ധനകാര്യവകുപ്പ് ചിന്ത ജറോമിന്റെ നിവേദനം പരിഗണിക്കുകയുയും 2017 ജനുവരി മുതൽ 2018 മേയ്‌വരെയുള്ള ശമ്പളം മുൻകാല പ്രാബല്യത്തോടെ ഒരു ലക്ഷമാക്കി ഉയർത്താൻ ഡിസംബറിൽ തീരുമാനിക്കുകയായിരുന്നു.

യുവജന കമ്മിഷൻ അധ്യക്ഷയായി 2016ൽ ചിന്ത സ്ഥാനമേൽക്കുമ്പോൾ വേതന വ്യവസ്ഥകളുമായി ബന്ധപ്പെട്ട് അന്തിമ തീരുമാനമെടുക്കുന്നതുവരെ പ്രതിമാസം 50,000രൂപ അഡ്വാൻസ് ശമ്പളം നിശ്ചയിക്കുകയും . പിന്നീട് അന്തിമമായി തീരുമാനിക്കുന്ന തുക 50,000 ൽ കുറവാണെങ്കിൽ അധിക തുക തിരിച്ചു പിടിക്കാമെന്നും വ്യവസ്ഥ ചെയ്തു.2018 മേയ് 26ന് യുവജന കമ്മിഷൻ ചട്ടങ്ങളിൽ ചെയർപഴ്സന്റെ ശമ്പളം ഒരു ലക്ഷംരൂപയായി നിജപ്പെടുത്തിയെങ്കിലും ഉത്തരാവായി പുറത്തിറങ്ങിയില്ല.തുടർന്നാണ് 2016 ഒക്ടോബർ 4 മുതൽ 2018 മേയ് 25വരെയുള്ള കാലയളവിൽ ഒരു ലക്ഷംരൂപ അനുവദിക്കണമെന്നും 2022 ഓഗസ്റ്റ് 20ന് യുവജനകാര്യ വകുപ്പിന് അയച്ച കത്തിൽ ആവശ്യപ്പെട്ടത്.

2021 ഒക്ടോബറിൽ ധനകാര്യവകുപ്പ് ഈ ആവശ്യം തള്ളി. തുടർന്ന് യുവജനകാര്യ സെക്രട്ടറിയുടെ അംഗീകാരമില്ലാതെ യുവജനകാര്യവകുപ്പിലെ ജോയിന്റ് സെക്രട്ടറി ഫയൽ വീണ്ടും ധനകാര്യ വകുപ്പിന് അയച്ചെങ്കിലും ആവശ്യം അംഗീകരിക്കപ്പെട്ടില്ല. ചിന്ത ജെറോം ധനവകുപ്പിനു നല്‍കിയ നിവേദനത്തിന്റെ അടിസ്ഥാനത്തിൽ ശമ്പളം മുൻകാല പ്രാബല്യത്തോടെ വർധിപ്പിക്കുകയാണെന്ന് 2022 ഡിസംബർ 28ന് ധനകാര്യ വകുപ്പ് അനൗദ്യോഗിക കുറിപ്പ് യുവജനകാര്യ വകുപ്പിനു കൈമാറി. എന്നാൽ ഇതു സംബന്ധിച്ച ഉത്തരവ് ഇതുവരെ ഇറങ്ങിയിട്ടില്ല.