ജനങ്ങൾക്ക് വേണ്ടി ജനങ്ങളെ സേവിക്കുന്നതാണ് വികസനം ! ബിജെപിയുടെ വികസന കാഴ്ചപാടിൽ ലക്ഷ്യം വികസിത അനന്തപുരിയെന്ന് സംസ്ഥാന അദ്ധ്യക്ഷൻ രാജീവ് ചന്ദ്രശേഖർ; വികസിത അനന്തപുരി സന്ദേശ യാത്ര ഉദ്ഘാടനം ചെയ്തു

ഭാരതീയ ജനതാപാർട്ടിയുടെ വികസന കാഴ്ചപാടിൽ ലക്ഷ്യം വികസിത അനന്തപുരിയാണന്ന് സംസ്ഥാന അദ്ധ്യക്ഷൻ രാജീവ് ചന്ദ്രശേഖർ. ജനങ്ങൾക്ക് വേണ്ടി ജനങ്ങളെ സേവിക്കുന്നതാണ് വികസനമെന്നും ഇന്നും തിരുവനന്തപുരം ജില്ലയിൽ 550 വീടുകളിൽ കുടിവെള്ള സൗകര്യം എത്തിയിട്ടില്ലെന്നും എൺപതിനായിരം പേർക്ക് വീടുകളില്ലെന്നും കണക്കുകൾ നിരത്തി അദ്ദേഹം പറഞ്ഞു. ബിജെപി സിറ്റി ജില്ല അദ്ധ്യക്ഷൻ കരമന ജയൻ നയിക്കുന്ന വികസിത അനന്തപുരി സന്ദേശ യാത്ര ഉദ്ഘാടനം ചെയ്ത് സംസാരിക്കുക ആയിരുന്നു അദ്ദേഹം.

“ഇന്നും തിരുവനന്തപുരം ജില്ലയിൽ 550 വീടുകളിൽ കുടിവെള്ള സൗകര്യം എത്തിയിട്ടില്ല. എൺപതിനായിരം പേർക്ക് വീടുകളില്ല. പ്രാഥമിക ശുചിത്വ സൗകര്യങ്ങൾ ഇല്ലാത്ത 204 കോളനികൾ തിരുവനന്തപുരത്ത് ഉണ്ട്, നഗരത്തിലെ 60% തെരുവു വിളക്കുകളും കത്തുന്നില്ലന്നും, നഗര സഭയുടെ 30 മേജർ റോഡുകൾ തകർന്ന് കിടക്കുന്നു. ക്രീയാത്മക പ്രതിപക്ഷമായി ബിജെപി തിരുവനന്തപുരം നഗരസഭയിൽ പെരുമാറിയതിൻ്റെ ഫലമായാണ് അഴിമതികൾ തുറന്ന് കാട്ടാനായത്. ഇനി ലക്ഷ്യം നഗര ഭരണമാണന്നും, നഗര ഭരണം ലഭിച്ചാൽ 45 ദിവസത്തിൽ 5 കൊല്ലത്തെ വികസന രേഖ അവതരിപ്പിച്ച് എല്ലാ വർഷവും നഗരസഭയുടെ പ്രവർത്തനത്തിൻ്റെ റിപ്പോർട്ട് കാർഡ് പ്രസിദ്ധികരിക്കും.”- രാജീവ് ചന്ദ്രശേഖർ പറഞ്ഞു.

തിരുവനന്തപുരത്തെ പൈതൃക നഗരമായി പ്രഖ്യാപിക്കണമെന്ന് പരിപാടിയിൽ വികസിത അനന്തപുരി അനുഗ്രഹ പ്രഭാഷണം നടത്തിയ എഴുത്തുകാരൻ ജോർജ് ഓണക്കൂർ ആവശ്യപ്പെട്ടു. ചടങ്ങിൽ ബിജെപി ഉപാദ്ധ്യക്ഷൻ കെ സോമൻ, സംസ്ഥാന സെക്രട്ടറി പൂന്തുറ ശ്രീകുമാർ തിരുവനന്തപുരം മണ്ഡലം പ്രസിടണ്ട് ചിഞ്ചു,ബിഡിജെ എസ് നേതാക്കളായ പ്രേം രാജ്, നെടുമങ്ങാട് രാജേഷ് എന്നിവർ പങ്കെടുത്തു