‘നിങ്ങളെ അധികാരത്തിലെത്തിച്ചത് ജനങ്ങളാണ്, അവർ കൈവിട്ടാൽ പിന്നെ ആരും കൂടെ ഉണ്ടാവില്ലെന്ന് മറക്കരുത്’; തൃണമൂൽ നേതാക്കൾക്ക് താക്കീത് നൽകി മമത ബാനർജി

കൊൽക്കൊത്ത: സന്ദേശ്ഖാലി സംഭവ വികാസങ്ങളുടെ പശ്ചാത്തലത്തിൽ തൃണമൂൽ കോൺഗ്രസ് നേതാക്കൾക്ക് ശക്തമായ താക്കീത് നൽകി ബംഗാൾ മുഖ്യമന്ത്രി മമത ബാനർജി. ജനങ്ങൾ കൈവിട്ടാൽ പിന്നെ ആരും നിങ്ങളെ തിരിഞ്ഞ് നോക്കില്ലെന്ന് മമതാ ബാനർജി വ്യക്തമാക്കി. പ്രാദേശിക തൃണമൂൽ നേതാക്കൾക്കെതിരായ ഭൂമി കൈയേറ്റം, ലൈംഗികാതിക്രമം, ചൂഷണം എന്നീ ആരോപണങ്ങളാൽ പശ്ചിമ ബംഗാൾ പ്രക്ഷുബ്ധമായി തുടരുന്ന സാഹചര്യത്തിലാണ് കടുത്ത താക്കീതുമായി മമത ബാനർജി രംഗത്ത് വന്നിരിക്കുന്നത് എന്നത് ശ്രദ്ധേയമാണ്.

“ഗ്രാമപഞ്ചായത്തുകളിലും പഞ്ചായത്ത് സമിതികളിലും ജില്ലാ പരിഷത്തിലുമുള്ള നമ്മുടെ എല്ലാ നേതാക്കളോടും ഞാൻ പറയാൻ ആഗ്രഹിക്കുന്നത് ഇതാണ്. ഒരുമിച്ച് ജോലിചെയ്യുക. നിങ്ങളെ അധികാരത്തിലെത്തിച്ചത് ജനങ്ങളാണ്, അതുകൊണ്ടാണ് നിങ്ങൾ ഇവിടെയുള്ളത്. ജനങ്ങൾ കൈവിട്ടാൽ പിന്നെ ആരും നിങ്ങളെ തിരിഞ്ഞു നോക്കുക പോലും ചെയ്യില്ല,” പുരുലിയ ജില്ലയിൽ ഒരു സർക്കാർ വിതരണ പരിപാടിയിൽ സംസാരിക്കവെ ബാനർജി പറഞ്ഞു.