പിടി ഉഷക്കെതിരെ എളമരം കരീം നടത്തിയ പരമാര്‍ശം തെറ്റ്;അത് പിന്‍വലിച്ച് മാപ്പ് പറയണം; രമേശ് ചെന്നിത്തല

രാജ്യസഭയിലേക്ക് രാഷ്ട്രപതി നാമനിര്‍ദ്ദേശം ചെയ്ത പിടി ഉഷക്കെതിരെയും, വടകര എംഎല്‍എ കെ.കെ രമക്കെതിരെയും ആക്ഷേപം ഉന്നയിച്ച സിപിഐഎം കേന്ദ്ര കമ്മറ്റി അംഗവും എംപിയുമായ എളമരം കരീമിനെതിരെ കോണ്‍ഗ്രസ് നേതാവ് രമേശ് ചെന്നിത്തല. പിടി ഉഷക്കെതിരെ എളമരം കരീം നടത്തിയ പരമാര്‍ശം തെറ്റാണ്. പിടി ഉഷ രാഷ്ട്രീയമുള്ള ആളല്ല. അത് പിന്‍വലിച്ച് മാപ്പ് പറയണമെന്ന് രമേശ് ചെന്നിത്തല ആവശ്യപ്പെട്ടു. കെകെ രമയെ അവഹേളിക്കുന്നത് വടകരയിലെ ജനങ്ങളെ അപമാനിക്കുന്നതിന് തുല്യമാണെന്നും ജനങ്ങളുടെ പിന്തുണയോടെ ജയിച്ചു വന്ന ജനപ്രതിനിധിയാണ് രമയെന്നും ചെന്നിത്തല പറഞ്ഞു.

തിരുവനന്തപുരത്തെ സിപിഐഎം സംസ്ഥാന കമ്മിറ്റി ഓഫീസായ എകെജി സെന്റര്‍ ആക്രമിച്ച് 11 ദിവസം കഴിഞ്ഞിട്ടും പ്രതികളെ പിടികൂടാന്‍ സാധിക്കാത്തത് എന്തുകൊണ്ടാണെന്നും ചെന്നിത്തല ചോദിച്ചു. ആഭ്യന്തരമന്ത്രി താനായിരുന്നെങ്കില്‍ 24 മണിക്കൂറിനുള്ളില്‍ പ്രതികളെ പിടിക്കുമായിരുന്നു. ഭരണഘടനയെ വിമര്‍ശിക്കുന്നതില്‍ തെറ്റില്ല, എന്നാല്‍ സജി ചെറിയാന്‍ അപമാനിക്കുകയാണ് ചെയ്തതെന്നും ചെന്നിത്തല കൂട്ടിച്ചേര്‍ത്തു.