രാജ്യവ്യാപകമായി വോട്ടർപട്ടിക സമഗ്രമായി പരിഷ്കരിക്കാൻ തെരഞ്ഞെടുപ്പ് കമ്മീഷൻ; ഉന്നതതല യോഗത്തിൽ തീരുമാനം

ദില്ലി: രാജ്യത്തെ വോട്ടർപട്ടികയിൽ സമഗ്രവും തീവ്രവുമായ മാറ്റങ്ങൾ വരുത്താൻ തെരഞ്ഞെടുപ്പ് കമ്മീഷൻ ഒരുങ്ങുന്നു. ഇത് സംബന്ധിച്ച മുന്നൊരുക്കങ്ങൾ ചർച്ച ചെയ്യുന്നതിനും പദ്ധതിക്ക് അംഗീകാരം നൽകുന്നതിനുമായി സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും മുഖ്യ തെരഞ്ഞെടുപ്പ് ഓഫീസർമാർ (സിഇഒമാർ) പങ്കെടുത്ത ഉന്നതതല യോഗം ദില്ലിയിൽ ചേർന്നു. അടുത്തിടെ ബിഹാർ നിയമസഭാ തെരഞ്ഞെടുപ്പിന് മുന്നോടിയായി വിജയകരമായി നടപ്പാക്കിയ ‘പ്രത്യേക തീവ്ര വോട്ടർപട്ടിക പരിഷ്കരണം’ (Special Intensive Revision – SIR) രാജ്യത്തുടനീളം വ്യാപിപ്പിക്കാനാണ് കമ്മീഷന്റെ തീരുമാനം.

തീവ്ര വോട്ടർപട്ടിക പരിഷ്കരണം എപ്പോൾ സാധ്യമാകും എന്ന തിരഞ്ഞെടുപ്പ് കമ്മീഷന്റെ ചോദ്യത്തിന്, മിക്ക സിഇഒമാരും സെപ്റ്റംബറോടെ അടിസ്ഥാനപരമായ കാര്യങ്ങൾ പൂർത്തിയാക്കുമെന്നും ഒക്ടോബറിൽ നടപടികൾ ആരംഭിക്കുമെന്നും ഉറപ്പ് നൽകിയതായാണ് വിവരം. മരിച്ചവർ, സ്ഥിരമായി താമസം മാറിയവർ, ഇരട്ടപ്പേരുകൾ, പൗരന്മാരല്ലാത്തവർ എന്നിവരുടെ പേരുകൾ വോട്ടർപട്ടികയിൽ നിന്ന് ഒഴിവാക്കുകയും അതോടൊപ്പം യോഗ്യരായ എല്ലാ വോട്ടർമാരെയും പട്ടികയിൽ ഉൾപ്പെടുത്തുകയും ചെയ്യുക എന്നതാണ് ഈ പ്രത്യേക പുനഃപരിശോധനയുടെ പ്രധാന ലക്ഷ്യം. വോട്ടർപട്ടികയുടെ കൃത്യതയും വിശ്വാസ്യതയും ഉറപ്പാക്കുക എന്നതാണ് ഇതിലൂടെ കമ്മീഷൻ ലക്ഷ്യമിടുന്നത്.

പരിഷ്കരണ സമയത്ത് വോട്ടർമാരെ തിരിച്ചറിയുന്നതിനും അവരുടെ താമസസ്ഥലം ഉറപ്പാക്കുന്നതിനും ഉപയോഗിക്കാവുന്ന രേഖകളുടെ പട്ടിക തയ്യാറാക്കാൻ തെരഞ്ഞെടുപ്പ് കമ്മീഷൻ സംസ്ഥാന സിഇഒമാർക്ക് നിർദ്ദേശം നൽകിയിട്ടുണ്ട്. പ്രാദേശികമായി അംഗീകരിക്കപ്പെട്ടതും എളുപ്പത്തിൽ ലഭ്യമാകുന്നതുമായ സർട്ടിഫിക്കറ്റുകളെ അടിസ്ഥാനമാക്കിയായിരിക്കും ഈ രേഖകൾ തീരുമാനിക്കുന്നത്.