“ഇത്രയും സൗന്ദര്യം നടന്മാർക്ക് പോലുമില്ല !”- കുപ്രസിദ്ധ അധോലോക നായകൻ ലോറൻസ് ബിഷ്ണോയിയെ പുകഴ്ത്തി സിനിമാ സംവിധായകൻ രാംഗോപാൽ വർമ്മ

കുപ്രസിദ്ധ അധോലോക നായകൻ ലോറൻസ് ബിഷ്ണോയിയെ പുകഴ്ത്തി സിനിമാ സംവിധായകൻ രാംഗോപാൽ വർമ്മ. ലോറൻസ് ബിഷ്ണോയിയുടെ അത്രയും സൗന്ദര്യം ഇന്ത്യയിലെ ഒരുനടനും ഇല്ലെന്നാണ് ആർജിവി സോഷ്യൽ മീഡിയയിൽ പോസ്റ്റ് ചെയ്തത്. ലോറൻസ് ബിഷ്ണോയിയുടെ ജീവിതം തിരശ്ശീലയിലേക്ക് കൊണ്ടുവരുമെന്ന് നേരത്തെ രാംഗോപാൽ വർമ്മ പ്രഖ്യാപിച്ചിരുന്നു.

“ഏറ്റവും വലിയ അധോലോകനായകനെക്കുറിച്ച് ഒരു സിനിമ ചെയ്യുകയാണെങ്കിൽ ഒരു സംവിധായകനും ദാവൂദ് ഇബ്രാഹിമിനെപ്പോലെയോ ഛോട്ടാ രാജനെപ്പോലെയോ രൂപമുള്ള ഒരാളെ നായകനാക്കില്ല. പക്ഷേ ഇവിടെ നോക്കൂ, ബിഷ്ണോയിയേക്കാൾ സൗന്ദര്യമുള്ള ഒറ്റ സിനിമാ നടനെ എനിക്ക് ഓർമവരുന്നില്ല.” – രാംഗോപാൽ വർമ്മ കുറിച്ചു.

ലോറൻസ് ബിഷ്ണോയിക്ക് നടൻ സൽമാൻ ഖാനോട് തോന്നിയ പകയേക്കുറിച്ച് രാം​ഗോപാൽ വർമ കഴിഞ്ഞദിവസം എക്സിൽ പോസ്റ്റ് ചെയ്തിരുന്നു. ഇതിനുപിന്നാലെയാണ് ബിഷ്ണോയിയുടെ സൗന്ദര്യത്തേക്കുറിച്ച് അദ്ദേഹം പുകഴ്ത്തിയിരിക്കുന്നത്. “

സംവിധായകന്റെ പോസ്റ്റ് വന്നതിനുപിന്നാലെ നിരവധി പ്രതികരണങ്ങളാണ് സമൂഹമാദ്ധ്യമങ്ങളിൽ നിറയുന്നത്. സൽമാൻ ഖാനെ ലോറൻസ് ബിഷ്ണോയിയായി അഭിനയിപ്പിച്ചാൽ അതൊരു വലിയ വിരോധാഭാസമാവുമെന്നാണ് ഒരാളുടെ പ്രതികരണം. ആർജിവി അദ്ദേഹത്തിന്റെ പുതിയ പ്രണയം കണ്ടെത്തി എന്നായിരുന്നു മറ്റൊരു കമന്റ്. സംവിധായകന്റെ കണ്ടെത്തൽ ഇങ്ങനെയാണെങ്കിൽ ബിഷ്ണോയിയെ അവതരിപ്പിക്കാൻ അയാളെത്തന്നെ ഏൽപിച്ചാൽ പോരെയെന്നായിരുന്നു രസകരമായ മറ്റൊരു കമന്റ്.