ഒടുവിൽ വിമർശനങ്ങൾക്ക് മുന്നിൽ സംസ്ഥാനസർക്കാരിനും അടി പതറുന്നു ! രഞ്ജിത്തിനെതിരെ പരാതി തന്നാൽ നിയമനടപടി ഉണ്ടാവുമെന്ന് മന്ത്രി എംബി രാജേഷ്.

ചലച്ചിത്ര അക്കാദമി ചെയർമാൻ രഞ്ജിത്തിനെതിരായ ആരോപണത്തിൽ പ്രതികരണവുമായി മന്ത്രി എംബി രാജേഷ്. നടി ശ്രീലേഖയുടെയും രഞ്ജിത്തിന്റെയും അഭിപ്രായങ്ങൾ മാത്രമാണ് പുറത്ത് വന്നതെന്നും പരാതികളൊന്നും നിലവിൽ സർക്കാരിന് മുന്നിൽ വന്നിട്ടില്ലെന്നും എംബി രാജേഷ് വ്യക്തമാക്കി .

“പരാതി തന്നാൽ നിയമനടപടി ഉണ്ടാവും. നിയമവാഴ്ചയുള്ള സംസ്ഥാനമാണ് കേരളം. നിയമത്തിന് മുകളിൽ ഒന്നും പറക്കില്ല. നിയമാസൃതം ഉള്ള നടപടി സർക്കാർ സ്വീകരിക്കും” – എംബി രാജേഷ് പറഞ്ഞു.

ബം​ഗാളി നടി ലൈംഗിക അതിക്രമ ആരോപണം ഉയർത്തിയിട്ടും ചലച്ചിത്ര അക്കാദമി ചെയർമാൻ പദവിയിൽ നിന്ന് രാജിവെക്കാത്ത സംവിധായകൻ രഞ്ജിത്തിനെതിരെയും രാജി ആവശ്യപ്പെടാത്ത സർക്കാരിനെതിരെയും കടുത്ത വിമർശനം ഉയരുന്നതിനിടെയാണ് എംബി രാജേഷിൻറെ പ്രതികരണം.
ആരോപണമുയർന്ന സാഹചര്യത്തിൽ രഞ്ജിത്ത് രാജി വെക്കുന്നതാണ് നല്ലതെന്നാണ് എൽ‌ഡിഎഫിൽ നിന്നുള്ള ഒരു വിഭാഗത്തിന്റെ ആവശ്യം. അക്കാദമി അംഗങ്ങളിലും സമാന അഭിപ്രായമുണ്ട്. വിഷയത്തിൽ സർക്കാർ തലത്തിലും തിരക്കിട്ട ചർച്ചകൾ നടക്കുകയാണ്. വിഇടത് കേന്ദ്രങ്ങളിൽ നിന്നും രഞ്ജിത്തിന്റെ രാജിക്കായി സമ്മർദം ശക്തമാവുകയാണ്.

അതേസമയം, വയനാട്ടിലെ റിസോർ‌ട്ടിൽ വച്ച് രഞ്ജിത്തിന്റെ ഔദ്യോ​ഗിക വാഹനത്തിന്റെ ബോർഡ് മാറ്റി.കേരള ചലച്ചിത്ര അക്കാദമി എന്ന ബോർഡ് അഴിച്ചുമാറ്റിയ ശേഷം വാഹനം ഇവിടെ നിന്ന് മാറ്റിയിട്ടുണ്ട്. ഇന്നലെ വൈകുന്നേരത്തോടെയാണ് രഞ്ജിത്ത് വയനാട്ടിലെ റിസോർട്ടിലെത്തിയത്.