ഹൈദരാബാദിൽ മയക്കുമരുന്നുമായി അഞ്ചംഗ സംഘം അറസ്റ്റിൽ ; പിടിയിലായവരിൽ ബോളിവുഡ് നടി രാകുല്‍ പ്രീത് സിങ്ങിന്റെ സഹോദരനും

ബോളിവുഡ് നടിയുടെ സഹോദരനടക്കം അഞ്ച് പേരെ മയക്കുമരുന്നുമായി ഹൈദരാബാദ് പോലീസ് പിടികൂടി. ബോളിവുഡ് നടി രാകുല്‍ പ്രീത് സിങ്ങിന്റെ സഹോദരന്‍ അമന്‍ പ്രീത് സിങ് അടക്കം അഞ്ച് പേരെയാണ് ഇന്ന് രാവിലെ അറസ്റ്റ് ചെയ്തത്.

2.6 കിലോ കൊക്കെയ്ൻ ഹൈദരാബാദിലേക്ക് വിൽപനയ്ക്കായി കൊണ്ടുവരുന്നതായി തെലങ്കാന ആൻ്റി നാർക്കോട്ടിക് ഡിപ്പാർട്ട്മെന്റിന് ലഭിച്ച രഹസ്യവിവരത്തെ തുടർന്ന് ലഭിച്ച പരിശോധനയിലാണ് അമന്‍ അറസ്റ്റിലായതെന്ന് പോലീസ് അറിയിച്ചു. അനികേത് റെഡ്ഡി, പ്രസാദ്, മധുസൂദനന്‍, നിഖില്‍ ദമാന്‍ എന്നിവരാണ് അമനെ കൂടാതെ അറസ്റ്റിലായവര്‍. അമന്‍ അടക്കം അഞ്ചുപേരും മയക്കുമരുന്ന് ഉപയോഗിച്ചതായി മൂത്ര പരിശോധനയില്‍ കണ്ടെത്തിയെന്ന് പോലീസ് അറിയിച്ചു. ഇവരെ വൈദ്യപരിശോധനയ്ക്ക് ശേഷം കോടതിയിൽ ഹാജരാക്കും.

പ്രതികള്‍ക്ക് നൈജീരിയന്‍ സ്വദേശികളുമായുള്ള ബന്ധമടക്കം പരിശോധിച്ച് വരികയാണ്. പ്രതികളില്‍ ചിലര്‍ തുടര്‍ച്ചയായി മയക്കുമരുന്ന് ഇടപാടിനായി ബന്ധപ്പെടുന്നവരാണെന്നും പോലീസ് കണ്ടെത്തിയിട്ടുണ്ട്.

2022 ലും 2021 ലും മയക്കുമരുന്ന് കടത്തും ഉപഭോഗ കേസുമായി ബന്ധപ്പെട്ട് രാകുൽ പ്രീത് സിങിനും എൻഫോഴ്സ്മെൻ്റ് ഡയറക്ടറേറ്റ് സമൻസ് അയച്ചിരുന്നു . കഴിഞ്ഞ വർഷവും ഇതുമായി ബന്ധപ്പെട്ട് ഇവരുടെ മൊഴി അന്വേഷണ ഏജൻസി രേഖപ്പെടുത്തിയിരുന്നു. രാകുലിനെ കൂടാതെ റാണ ദഗ്ഗുബതി, ചാർമി കൗർ, നവദീപ്, രവി തേജ എന്നിവരെയും മയക്കുമരുന്ന് കേസിൽ ചോദ്യം ചെയ്യാൻ വിളിച്ചിരുന്നു.